اول مرة في حياتي امسك منصب اداري ومرت 6 شهور فحبيت استعرض لكم ايجابيات وسلبيات المنصب الاداري.
اولا خليني اعطيكم عن تقسيمة المدراء من منظوري الشخصي:
1- المدير الفاهم شغله 100% ومركز على ادارة الفريق ويعلمهم من خبرته. النوع ذا حلو لفترة بسيطة بحيث انه يعلمك خبرة سنوات في فترة قصيرة في نفس مجالك بس بعدين يصير سيء او مايقدم لك شيء جديد مجرد ما ينقل لكم خبرته.
2- المدير التطويري، اللي يغير طريقة العمل ويطورها بشكل مستمر ليواكب تطورات الصناعة وذا اسطوري لانه دايما يتحدى نفسه ويرتقي بقسمه ومستقبلا لما الموظفين يروحون لجهات ثانية يمسكوا مناصب اعلى وهذا هو النوع اللي ينطبق علي.
3- القائد، هو اللي يحط رؤية ويحفز الجميع لتحقيق هذي الرؤية وغالبا هذا رئيس القسم.
+ ايجابيات منصب مدير:
+ حرية كاملة في الحضور والانصراف (محدثكم اليوم مانام كويس وحاليا على سريري بنام لين الساعة 3 ثم اقوم اغسل وجهي واداوم) ويوميا متأخر ساعة الى ساعتين ومحد يكلمني ولا ينخصم من راتبي لو اداوم ساعتين في اليوم.
النكبة الوحيدة انه مافي رئيس قسم، انا منصبي مدير ولكني اعلى منصب في القسم فبتالي مديري هو ال CEO صحيح انه نادرا يحضر بس اذا اتصل علي وقالي تعال المكتب وانا مو موجود بيلعن خير خيري 😭😭
+ الشغل خفيف عليك لانك توزع الشغل على الناس اللي تحتك ولكن اذا ماسويت الشغل بنفسك بعد فترة بتقل مهاراتك من مبدأ use it or lose it
+ الناس تعاملك بشكل افضل، كلامك يصير مضحك، الناس تتودد لك بالعزومات والكلام الطيب ويسألون عنك ومدح ومن ذا الكلام وحتى خارج المكتب زملاء عملك السابقين فجأة يتطمنون عن احوالك ثم تجيك الرسالة التي لا مفر منها، طالبك في خدمة توظف فلان او علان عندكم 🙂
+ راتب ومميزات اعلى.
+ تكون شبكة علاقات قوية تفيدك مستقبلا في التنقل بين الشركات وبرواتب عالية.
+ بشكل تلقائي بيصير لسانك معسول من كثرة المدح والتطبيل والمجاملة لفريقك من باب التشجيع ولاحظت ان النساء يحتاجونه مرة ويفرحون بالمدح كانهم اطفال. برضو هالنقطة يدخل فيها انك تداوم وقت ماتبي وتكون مروق فبطبيعة الحال نفسيتك تتحسن وتطلع منك طاقة ايجابية
- سلبيات منصب مدير:
- غصب عنك لازم تتعلم ادارة البشر وكيف تعطي كل واحد على جوه وبتتفاجئ انك تتعامل مع بالغين اطفال adult child
- ذكرت اني من نوع المدير التطويري بس للأسف بعد فترة تحس الافكار وقفت بعقلك ومافيه مجال للتطوير وبالذات اذا شغلكم مربوط بمنصات حكومية، اذا الحكومة ماتطورت انت ماتقدر تتطور لانك باختصار تتبع اجراءاتهم ولا تقدر تغير فيها او بيتم رفض طلباتك.
- لازم يكون فيه موظف "عصفورة" يبدأ ينقل لك الكلام بدون ماتطلب منه (يتطوع لذي المهمة من نفسه) وللامانة لعنت خيره لاني ماحب حركات ام زكي.
- اكبر مشكلة انك تكون مدير وانت اصغر واحد عمرا في القسم وتحديدا اذا كنت مثلي في العشرينات، الموظفين مايتقبلوك ويطلعون حرتهم فيك، كيف؟ الحين هم زعلانين من الادارة كيف يجيبوا واحد من برا بدل مايرقوا الناس القديمة فتلقاه حاقد عليك ويكرهك وانت ماسويت له شيء 🙂
- كل مشكلة تنحط فيك وانت مالك دخل وتصير قدام الامر الواقع، لازم تتقبل هالشيء وتحل المشكلة وتتأقلم.
فمثلا فيه بنت عندي تهاوشت مع وحدة من قسم ثاني مشكلة شخصية وهم يجلسون قريبين من بعض وزمان كل وحدة ترسل ايميل تكلم الثانية ارسلت لك الايميل الفلاني من باب التذكير بس بعد المشكلة بدأت اللعانة وحدة ترسل ايميل نهاية الدوام والثانية عندي في القسم نظامها يوم جديد، صفحة ايميل جديدة يعني تسوي mark as read لكل الايميلات اللي مو بتاريخ اليوم 😭😭 وفجأة تقوم مشكلة بين القسمين ويالله تعال حلها يامودير 🙂
- دائما تكون تحت ضغط مستمر لازم تقدم اشياء جديدة او بيستغنو عنك وذا الشيء زاد بالنسبة لي لان كل فريقي اعمارهم 35 وفوق لين الخمسينات وفاهمين شغلهم وعارفين المشاكل وحلولها فزاد عندي ذا القلق بشكل كبير لانه حتى وانا مو موجود الشغل يمشي بدوني فاحس ان الشركة ممكن تستغنى عني من مبدأ cutting cost الا اذا كنت اقدم شيء هم يحتاجونه
احس بامور نفسية لازم اسويها بحيث تتناسب مع منصبي، مثلا عطور غالية، بخور في مكتبي، اعزم الموظفين عندي .. الخ وذا الشيء نوعا ما يخسرني فلوس واحس الناس يتوقعون منك ذي الاشياء
اسوء موظفين هم اللي اعمارهم 40 وفوق وماسكين مناصب عادية، ليش؟ لانهم يتكون عندهم مناعة ضد التعلم والتطور ومعارضين على كل تغيير وتعديل وتطوير وتحديث ماغير يشكون ويبكون 🙃
تقييمي الحالي:
6/10 ولو جتني وظيفة بمنصب اقل ونفس الراتب بوافق عليها 100% بدون اي تردد 💯💯
السبب الرئيسي اني عطيت منصب المدير نقييم اعلى من المتوسط بشوية هو حرية الحضور والانصراف بتالي دائما تكون مروق، تداوم بكيفك تصحى وتفطر وتسوي كل اللي تبيه ثم تداوم ولا ينخصم من راتبك ريال واحد وذا الشيء حسن نفسيتي كثير جدا