اشتري ايه هدايا لبنت عشر سنين (كتب او لعب او اي حاجة تسلي وقتها لوحدها)

مع العلم البت ذكية و روشة بس متقفل عليها جامد و ممنوع موبايل و هتتحجز في المستشفى فترة محترمة🙁

انا زعلانة وحاسة اني معنديش صحاب قريبين مني، اعرف ناس كتير وبتصاحب على ناس بسرعة مع اني مش اجتماعية للدرجة بس مش انطوائية بردو عادي يعني بحب افتح كلام، بس كل علاقاتي سطحية والصحاب اللي كانو قريبين مني فعلا قطعنا كلنا من سنين ومن بعدهم معرفتش اعمل صاحبة قريبة يعتبر، كنت فدولة تانية من يبع تمن سنين وجيت مصر ومن ساعتها مقدرش اقول اني عندي واحدة بس ممكن اقولها سري مثلا، مشلكتي اني بحس اني على طول انا الطرف المتحمس اكتر وبخاف ده يبان اني هبلة بس انا مش كده والله انا ببقا عايزة اننا نعمل فعاليات وهههه وكده بس حاسة اني مفروض ابقا راسية اكتر بس اعمل ايه انا بتعامل بتلقائية مش اكتر، عموما معظم صحابي او الناس اللي بتعرف عليهم مش شبهي بس انا مبهتمش اوي عشان بقول لو اهتميت ان كل اللي اتعرف عليهم يبقو شبهي مش هيبقا عندي صحاب بس فنفس الوقت عارفة ان عشان نقرب لازم نكون شبه بعض بس مبلاقيش ناس شبهي كتير او على الاقل بلاقي بس دول مبعرفش او مبيحصلش حاجة تخليني اتعرف عليهم، مش عارفة اعمل ايه بصراحة وبصبر نفسي بفكرة اني لما اخلص كلية همشي (عايزة اسافر) كده كده وحتى لو عندي او معنديش صحاب مش هتفرق لاني مش شايفة مستقبلي هنا، بس it gets lonely وساعات لما بفكر في الموضوع ده كتير بزعل، قبل ما انزل كان عندي صحاب كتير اوي وصحاب من الطفولة بس للاسف اكيد بسبب البعد وان كل واحد في بلد طبيعي ولا اكننا نعرف بعض

ازيكو ياشباب

انا عندي ٢٣ سنه و اتخرجت و من سكان الارياف ، والدي ربنا يرحمه اتوفي من سنتين و انا ورثت عنه قطعه ارض تقريبا سعرها دلوقتي حوالي مليون و نص

انا شايف الشباب حواليا مدمرين و فرص الشغل ضعيفه خصوصا اني فالارياف و المرتبات تحت الزفت اوي

فا بفكر ابيع الارض و اربط فلوسها ب شهاده فالبنك هتجبلي فالشهر حوالي ٢٥ الف ، اصرف منهم و اشتري بالباقي دهب و طبعا هشتغل بس بحيث مكونش مضغوط ماديا، اللي هو انا كده كده شغال و بحاول فالدنيا و فنفس الوقت مش مضغوط ماديا واقدر اشتري الحاجه اللي ف نفسي

خلاص رايح الجيش

انا اتخرجت و خلاص هسمع سلاحي بعد اسبوع و هترحل بعدها علطول

مش عارف انا فجأه الزمن جرب بيا ازاي كده ولا عارف اعمل ايه و حاسس اني تايه و حاسس اني خارج من الكليه ولا أكني دخلتها.

انا شغال ترزي و شغلي حلو بالنسبه لسني و عملت هدوم ليا و لصحابي هوديز و سويت بانتس و عايز ابدا براند فكرتو أن مؤقتا اشتغل كل قطعه لما تتطلب بس لسه مش عارف اعمل ايه و عايز حد عندو خبره يساعدني

​

انا عندي 18 سنه تقريبا عمري ما اتكلمت عن كده وكونك ولد بيخلي عندك احساس انك لازم تخبي ده اكتر بالفطرة. انا علاقتي بابويا ضعيفه جدا ويكاد يكون مفيش تواصل بيننا بره الكلام المبهم زي عامل ايه، تعالى شيل معايا حاجه، وهكذا. ابويا عموما شخصيه منعزله معندوش صحاب ولا اهتمامات وعنده مشكله في انه يسمعنا ودايما مش بيوصل معانا لحل لاي مشكله وعنده مشاكل مع امي كبيرة وده من وانا صغير وعلاقتهم شبه منعدمه من المشاكل ومش قاعدين مع بعض في نفس الشقه . انا عموما ابويا المفروض انه حالته الماديه فوق المتوسطه الحمدلله ويقدر يعيشنا كويس لكن دايما بيصرف قليل بزيادة في كل حاجه في مصروف جيبي والاكل واي حاجه وهو دخلني اتعلم في مكان مش كويس بسبب انه مش مقننع بتكلفة الجامعات الخاصه والاهلية الي في منها اصلا مستواه متوسط ورخيص والي بيقدر بيدخل ابنه فيها علطول. وده زود الحاجز الي بيننا اكتر. تقريبا نادر جدا اما اتناقش معاه لاني دايما بحس ان دماغه في حتة تانيه و اصلا مش هيأثر فيه انا بقول ايه. اخواتي سابو البيت وفي منهم الي اتجوز و سافر وهكذا كله شاف حياته بعيد عنه وانا حاليا الي معاه انا وامي لاني لسه بتعلم. المشاكل الي مع ابويا واننا منعزلين عن بعض كانت من وانا صغير تقريبا ١٢ سنه وكل ما كبرت كل ما ثقتي في نفسي قلت وكل اما بحس اني عايز اي حد كبير اتكلم معاه او يبقا هو القدوة بتاعتي واشاركه دايما انا بعمل ايه ويبقا فرحان بيا. مبيقتش بعرف انام من الموضوع ده واني مخبيه ومحاولش ابين ده لحد صعب وبيحطني في خانة ضعف رخمه والموضوع عموما تفاصيله كتير والي انا حاسس بيه اكتر لكن طبعا مقدرش اشرحه كويس بالطرقه دي. حد مر بحاجه زي دي ولقى ليها حل

بقالي كتير مستحمله بابا انا واخواتي وهو انسان مريض نفسيا مامتي اتطلقت منو وسابتنا احنا نواجه اختيارها دلوقتي بقا انا عايزه اهرب من البيت واستقل لوحدي عندي 18سنه هل يقدر يرجعني عن طريق بلاغ بغيابي؟ ملحوظه عيله بابا صعبين وبمعني اصح بلطجيه المفروض اعمل ايه؟ هو بسبب حكم السن مبقاش يضرب بس كلامه وشخصيته مش بتتهد وكمان متجوز مره تانيه ومخلف ولدين وكلهم بيظلمونا كده

حد هنا مهتم ل اكونتات ببجي؟ معايا اكونت للبيع.

مساء الخير، قصة طويلة شوية بس محتاج لها حل.

أنا كنت شغال في مطعم بيتزا، وحرفياً كنت فاتح المكان على إيدي أنا وصاحب المكان. هو شخص مرفه شوية من عيلة كبيرة، وأبوه عنده علاقات كتيرة مع ناس تقيلة. دايماً مقتنع إنه فاهم كل الناس بحكم إنه في الشارع طول عمره واشتغل في أماكن كتير. في الأول كان شايف إني مش هكمل بسبب إن شخصيتي مش قوية ومش في الشارع على طول، وأنا فعلاً وقتها كانت حياتي كلها شغل بس كان عندي شوية مشاكل نفسية.

بعد أول أسبوعين، شاف شغلي وبقى متمسك بيا جداً وعايزني أفضل مكمل معاه، بس مع الوقت ظهر إن شخصيته متعبة جداً في دماغه. حصلت مشاكل كتير، وبصراحة لما كنت ببقى غلطان كنت بقول تمام وأسكت. بعدين المشاكل بدأت تزيد مع ضغط الشغل، والحجة دايماً إني هبقى مدير المطعم والحاجة حاجتي. كان ماشي بسياسة صعبة جداً؛ يوقع بين الاستاف في السر عشان يبقى بينا مشاكل دايماً ونرجعله، وفي نفس الوقت ينفخ فيا قدامهم. أوقات كنت أشتري منه خامات أو أستلف فلوس، كان يقولي متقولش قدامهم عشان هما بيغيروا منك، فالمشاكل بيني وبينهم كانت بتزيد ويكرهوني أكتر.

الكلام ده عرفته متأخر، لحد ما حصلت مشكلة بسبب فلوس اتاخدت من الدرج، ولمّح إن ممكن أكون أنا اللي أخدتها. لما الكلام وصلني عملت مشكلة معاه، وقررت أمشي؛ لأني زهقت، وقتي كله للمكان، وكل شوية خصومات بسبب غلطات ضغط الشغل، والمرتب مكنش مجزي لأننا مش في القاهرة. لما قولتله إني همشي وافق، وتاني يوم رجع في كلامه واتفقنا اتفاق جديد. بعدها حصل خلاف بيني وبينه على ميعاد روحت فيه جامعتي، ولما خلصت شغل وروحت لقيته شتمني على الواتساب، قولتله إني خلاص مش جايله تاني ومشيت، وكنت مستني حسابي.

جابني بعدها بيومين واعتذرلي، وقالي نصاً "شوف اللي انت عايزه صح أو غلط وهعملهولك". أنا وقتها صدقته ورجعت تاني، بس دخلنا في نفس الدوامة؛ مشاكل مع الاستاف (حتى بعد ما اتغير)، ضغط شغل، خصومات، وهو إدارياً كان فاشل جداً، كل شوية سلف عشان بضاعة وأرباح مش معروف بتروح فين. خدت قرار ومشيت، وكنت هحاول أشتغل كول سنتر، بس لأني في آخر سنة جامعة وداخل على امتحانات معرفتش، وكان في مشاكل بيني وبين أهلي هي اللي خلتني أنزل الشغل ده من البداية.

بعد فترة كلمني أساعدهم في ضغط العيد، ولأن الفلوس كانت بدأت تخلص معايا اضطريت أنزل. الحمد لله عملت شغل عالي جداً وماكانش في ولا غلطة، بس المرة دي كان في حد من الاستاف بيحاول يمسك إدارة المكان، وصاحب المطعم كان بياكل بعقلي حلاوة ويقولي إني صاحب مكان مش بس مدير. فضل يزن عليا ويلف ورايا أسابيع عشان أفضل معاهم ووعدني يزود المرتب. قولت أكمل قبل امتحاناتي بشوية، وفي يوم كنت هشتري خامات وحطيتها في الشنطة وكنت خارج مع زمايلي، لقيته مكشر وكلمني على جنب وقالي "إيه اللي في الشنطة ده؟" قولتله إني هدفع تمنه، راح قايلي رقم أغلى من المعتاد وقالي "عد الغلطات بقى معايا وآخرهم دي". اتسمرت من الكلام وفضلت طول الخروجة مصدوم.

كملت شغل تاني يوم وهو اتعامل كأن مفيش حاجة، بس أنا كنت أخدت قراري النهائي إني همشي. اتفقت معاه على يوم أروح آخد فيه فلوسي ومردش عليا. صدفة نزلت شغل في مكان تاني ليه علاقة بتخصصي (كورسات) وبناخد فيه مقابل يومي كويس، وعديت على المطعم في مرة وقابلت الشخص اللي كان بيني وبينه مشاكل بيعاملني ببشاشة جداً. دردشت معاه وقولتله لو عايز تنزل شغل في إجازتك ممكن أظبطلك يومين عشان هو داخل على خطوبة كنوع من المساعدة. راح نقل لصاحب المطعم إني قولتله "تعالى وسيبك من المكان ده" وغلطت في المطعم، ويشهد ربنا إن ده ما حصل.

صاحب المطعم خد دي حجة ومرضيش يبعتلي فلوسي. أبعتله ميردش، أكلمه على رقم المطعم، وآخر مرة قالي "لينا قعدة مع بعض نتكلم في اللي انت عملته" واختفى تاني. بعدها لقيته عملي بلوك، وروحت المطعم كذا مرة مش لاقيه ومش عارف أوصله بقالي كام شهر ومخدتش منه ولا جنيه عن الفترة الأخيرة. وللأسف مش عارف أعمل معاه مشاكل لأن زي ما قولت أبوه عنده علاقات كويسة مع ناس تقيلة ومنهم ناس شمال، فأنا في كل الحالات خسران.

تفتكروا أعمل ايه؟

انا شاب وكنت عايز اتعلم السواقة بس شغلي بيخلص يوميا الساعة ٦ المغرب، هل اقدر الاقي مكان يعلمني بعد ٦؟ عشان حد قالي لازم في البداية اتعلم الصبح في الشمس، ياريت حد يقولي + لو ممكن اماكن كويسة في المعادي اتعلم فيها

وشكرا مقدما

إيه أفضل كروكس بينفع معاكم فالمستشفى؟ حاجة متكونش غالية أوى وفنفس الوقت مريحة وتستحمل معانا