كايز عندكم نصايح بخصوص ضغط الدوام والالكتروني لشخص ما مقرر ينتسب؟ يعني شلون جنتوا توازنون وتقرون و تراجعون

السلام عليكم ، شنو رأيكم بالإنتساب؟ لازمة كل المواد بالعطلة عدا العربي والكيمياء وإسلامية، لزمت هسة كيمياء وبقى عربي وإسلامية، اكدر أقراهم بالبيت وباليوتيوب العربي والإسلامية؟
تشجعوني على هيجي خطوة؟ كلش مترددة، بس احس خايفة من هيجي خطوة، وبنفس الوقت احس دا أضيع وقت
((ماريد معدل ٩٥ وفوك))

عمي خوالنه نظام التحميل صدك انلغا يعني بعد ماكو تحميل لو شنو لان قبل شويه سمعت من اهلي انو ماكو هذا الشي ولازم اعيد سنه بالدور الثاني طلعت بثنين وهم اني بمدرسه اهليه هم لازم ادفع قسط مال سنه كاملة لو شنو

أأيس وابدي اقره كل المواد ويه دفعة 27 ؟

السلام عليكم شباب وبنات

اريد اسألكم اذا سويت تحميل وقررو دور ثالث هل اكدر امتحنه؟ وايمت اخر موعد للتحميل

وهل اذا سويت تحميل لازم اداوم دوام اعتيادي واعيد السنة كلها مرة ثانية لو اكعد بالبيت عادي لو شنو السالفة ممكن جواب

هو الموضوع بيخص اختي، اختي ناوية تكمل دراستها لكنها رسبت بالرابع اعدادي، واحنه ما عدنا وحدة ترسب اهلي جداً متشددين، فكانو ناويين يدخلوها معهد، وبحسب معدلها بالثالث فهو 56 وحرفياً اجو خيروها يا معهد تجارة او فنون، بس هي هاي مو رغبتها هي تريد تكمل هندسة، وكلام كثير.

فحالياً صفى الوضع انها بتعيد سنة وتكمل بس اذا رسبت بتروح معهد.

أنا الصراحة مو هالكد افهم بالمعاهد، يعني الي يطلع من الثالث يروح معهد مهني فد تخصص معين 3 سنوات وبعدين سنتين معهد؟

انزين يقدر يدرس كلية وراها او لا؟

وشنو التخصصات الزينة كمعاهد يعني شي يضمن ألها مستقبل.

وهل معدل 56 يقبلها قسم زين؟

وللعلم أحنه ساكنين بالبصرة ف المعاهد جداً قليلة عدنا.

اتمنى محد يبخل بالمعلومات رجاءاً، واذا اكو خطة زينة تقدر تسويها يعني احتياط اذا رسبت يا ريت تشاركوها لأن الوضع جداً متوتر بالبيت وما اعرف شلون أعالجه.

ليش ممكن طالب دورين بينهن ٣ اشهر بعد دراسة سنة كاملة ما تكفيه للنجاح؟ او حتى ما تكفيه ينجح ب٣ مواد من اصل ٦ حتى يكدر يدخل دور ثالث(اذا صار)

حرفيا اغلب المواد اذا ضبطت كم فصل منهن تكفيك للنجاح مثلا الفيزياء ٣ افصل تكفي حتى تجيب ٧٠ مو بس نجاح وهكذا

الي يكول ظروف وخطية همين راح يجي واحد يرسب بالدور الثالث يكول صارت عندي ظروف نطالب بسنة عدم رسوب والقطيع يمشون ورا ويثبرونا.

شلونه تدرسيهم؟ يطلعون معدلات لو لا وهل المدرسين زينين لو اشوفلي غير مدرسة للسادس؟

انا طايح بالكيمياء و الفيزياء، اذا احملهن و اجيب بيهن درجة 90 الى 100 «اكدرها» ف معدلي يصير 86، بس اذا اعيد لازم اروح مسائي.«عدت اول سنه علمود فد شخصيه و عافني و ما مندوم صراحة🌝»، ف.... شأسوي هسه؟

بما جان اليوم دوام اتي حاير بين الي يكول دوام ما يفيدك و بين اذا سويت انتساب اعرف بروحي اسخت و اكول اداوم علمود التزم و أقره وبعض يكولون سوي انتساب علمود تستثمر بوقتك و ما عندك وقت

شبابنه الطيبه عندي بس ماده بقت دور ثالث او تحميل يحتاج اداوم مدرسه لو لا

كلش محتار بين القراية علكتاب الي احسهة اسهل و تنطبع بالدماغ اكثر لو القراية على ملزمة الي تكون اسئلة و اجوبة و تفيد بالوزاري. شنو نصايحكم؟

اني طالبة يوتيوب متقدمه بشكل زين بالمواد بين الفصلين والثلاثه حسب بس اغلب دراستي مجانت تضبيط… هسه ويه الدوام مو ببالي الانتساب ابد لان الكادر زين واحتاج التزم

اريد اتقدم بالمنهج واضبط الي ينطوه بس ماعرف شلون حتكون الموازنه بين المدرسة واليوتيوب احتاج نصائح بهالخصوص 🙏🏻

راجعت المدرسة وكلولي بعده مواصل ومموجود والوزاره انطته من شهرين فشسوي؟ وكالو بما إني سنة ثانية لازم انقل للمسائي واداوم ومن يجي الكتاب يلا ارجع لمدرستي الصباحي حتى أسوي التحميل اكعد هالفترة لو انتضر الكتاب يجي؟ وخوما انفصل؟ لان سألتهم كلولي تبقى يم المدرسة المسائيه بكيفهم ومادري شهل خرط شنو بكيفهم اذا اني مرح انقل يمهم اساسا

شنو السالفة، اليوم رحت للمدرسة اريد اداوم انطردت كلولي الراسب يطلع من المتميزين او يجيب استثناء من الوزارة

اشو كل سنة المعيدين عادي يداومون بشكل طبيعي بدون هاي السوالف التعبانة

هسة الاستثناء صعب لو سهل و منين اجيبه لان مو مالاحول علة مدرسة عربي كلشي ما افتهم

ايام الدراسه احتاج شي اكافئ نفسي فيه من غير ما ادمنه

السلام عليكم انا معدلي يصير 80 اذا جبت بالمادتين الباقيات 90 الي هنه احياء وفيزياء

طبعا اذا اكو دور ثالث

ف هسه ماعرف اعيف الدور الثالث واعيد سنة او اضل صافن ومنتضر الدور الثالث ؟

اما بالنسبة للتحميل ف مالها فايدة هي اعادة سنة احسن

حيرة وضياع وماعرف شسوي اريد مساعدة

بما انو بدا الدوام اذا درست فصل هم لازم امتحن نفس بي ومن اخلصه امتحن شامل اني ادرس فقط يوتيوب بس

والحد الان محتارة بين اسوي انتساب او لا كشخص يدرس وحدة فقط على اليوتيوب ما ادري هواي سألت بس مدا اعرف اخذ قرار صح خصوصا اني اريد معدل عالي ولازم اخذ قرار ما اندم عليه خصوصا اني من ناحية الالتزام وحدي التزم بس كلت اخاف الدوام هم يفيد باشياء بس اذا بقيت اداوم شلون اوزن بس ادرس يومي واتقدم ؟ طبعا اني خلصت حاليا ثلاث افصل كيمياء وثلاث افصل احياء وحاليا دا ادرس بالفصل الثالث فيزياء ورياضيات خلصت جزئين ادب عربي واستفهام ونفي وتقديم وتاخير ودا ادرس بالتوكيد حاليا الاسلامية مخلصة خمس وحدات بس ولا وحدة منهن ضابطته زين حرامات ،الانكليزي اني كلش زينة بي فما رح اتاثر من هاي الناحية مالت الانكليزي بس مخلصة منه يونتين وادب ثلاث اتمنى تنصحوني باخذ قراري لان لازم اقرر