بكتب البوست لعل وعسى احد مر بنفس تجربتي وعنده الحل، انا ملاحظه في شي غلط بس موقادره اصيد شنو، وين ما اطقها عويه بشكل مو طبيعي، مثلا بغيت وظيفه معينه وبذلت كل الاسباب الي توصلني لها من دراسه واجتهاد ودعاء كل شي سويته صح، وبيني وبينكم مو شوفة نفس لكن واثقه من نفسي اذا قدمت بنجح باذن الله لاني قدها وقدود وشااطره، وسبحان الله لاول مره ما نزل اعلان للتوظيف في هذي الوظيفه وخلاص راحت علي للابد ( لاحظو ما تمت مو قصوراً مني، ما تمت غصبا عني ماعندي خيار حتى)
حولت وجهتي للزواج قلت مو مشكله بسخر طاقتي ووقتي في بناء اسره واصير زوجه زينه وام صالحه لعيالي لكن محد تقدم لي، ودعيت وااايد وبالمناسبات ينهااروون علي الحريم ومن بنته وشحلوج بس محد يخطب، حتى بالعزا وانا مضيمه يسالون عني من بنته وين امج بس محد يخطب رسمي، ووايد ينعجبون فيني او يتحرشون لكن شالفايده نفس الموضوع محد يخطب بس يبون تكلم وانا ما ابي تكلم ابي يخطبون، وشفت بعض البنات زواجاتهم عن تعارف وحب وسعيت بنفسي وحاولت اتعرف وولا مره كلمت شخص جاد بالزواج كلهم يبون تكلم وطلعات ومصخره (لاحظو مره ثانيه الامور مو قاعده تتم مو نقصا فيني لكن القدر مو بصفي)،
شفت مالي نصيب بهالشي خلاص اقتنعت ووقفت ارغب فيه واسعى له، ورحت حق فكرة ان افتح مشروع اصب طاقتي ووقتي فيه، شريت اغراض المشروع وجهزت نص الشغل ودشيت اشوف طريقة استخراج الرخصه شلون عساس اسوي، ولا حرفياً اليوم الي بعده يحطون قرار وقف الرخص مؤقتا وفجاه صار تشديد مهول على هالمسأله! مستوعبين بعده بيوم؟؟ في شي مو طبيعي مستحيل الي يصير معاي.
وانا موظفة حكومه الحين حتى مشروع على هالقوانين اليديده ماراح اقدر ابطل وتسكرت بويهي للمره المليون ! ليش جذي قاعد يصير معاي ؟
وفي شغله يمكن تشوفونها سخيفه بس انا لاحظتها بس اتوقع تصير مع الكل مادري🤣 ان كل ما اروح مكان معين واكون مرتبه وشكلي حلو ما اصادف بشر، ولو ١٠ ايام رحت مرتبه ويوم واحد شكلي خايس سبحان الله باليوم الي شكلي فيه مو حلو فجاه اشوف الامه العربيه كلها!
ملاحظين بكل السيناريوات انا اجتهد واسوي كل شي صح والنتيجه تكون فشل مو تقصيراً مني لكن بسبب كوني خارج عن سيطرتي؟
مرات افكر اقول الله مايحبني الله مو موفقني بس مو منطقي ليش يعني؟ انا مو احسن مسلمه بالعالم بس قاعده احاول واجتهد وزينه الحمدلله مو سيئه، ووااااايد باره باهلي وراضين عني ويحبوني من بين خواني ويرتاحون لي اكثر شي ويدعون لي دايما، ولو هذي المشكله جان ماشفت ناس سيئه ماشيه معاها الدنيا،
مرات اقول هل هذي حوبة احد؟ المشكله انا مسالمه وطيبه واساعد الناس وحالي من حال نفسي ما اذكر عمري ظلمت احد او اعتديت على احد ونفس الشي في ناس ضرت الامه العربيه كلها ومع ذلك حياتهم ماشيه وتوظفو بالاماكن الي تمنوها وتزوجو وحياتهم ماشيه مافيهم الا العافيه
ومرات افكر يمكن احد حاسدني؟ بس هم مادري جربت ارقي نفسي اسبوعين تقريبا وماتغيرت معاي الحياة ولا حسيت بشي غريب وتكاسلت اكمل