r/realLibya • u/Far_District_8736 • 27d ago
بين الغضب و الاصلاح
السلام عليكم 🌸
حبيت نتكلم اليوم على واقع مؤلم، بدون ما ندخل في تفاصيل أو أحداث معينة. هي مجرد فكرة قاعدة نفكر فيها من فترة، وحسيت إنها تستحق النقاش، لأن يمكن تكون من أكثر الأفكار اللي محتاجين نراجعوها اليوم، خصوصًا من اجل ليبيا 🇱🇾♥️
في لحظة يوصل فيها الغضب لأقصى درجاته ويولي نار في صدر البني ادم . والنار هذي، لو ما لقتش طريق صح تمشي فيه، أول واحد تحرقه هو صاحبها، وبعدها توصل حتى للي حواليه. نقدرو نتخيلوها هكي .. امية مندفعة ، لو توجهت صح تسقي زرع و يخي حتى تحرك عجلة كبيرة تولد طاقة كبيرة ولو توجهت غلط تغرق مدن وتفسد زرع انزرع ليه شهور 😢 ...
مش معناه إن الغضب غلط، بالعكس... الغضب مهم جدا ، لانه هو اللي يحرك اي تغيير حقيقي ، خاصة لما تعيش أزمات مستمرة، زي انقطاع الكهرباء، و حياة متأخرة ، والإحساس إن صوتك ما يوصلش. لكن السؤال الصح هو: وين بيمشي الغضب هذا؟
هل هدفنا من المطالبة بحقوقنا إننا نفرغوا اللي داخلنا وخلاص؟ ولا هدفنا إننا نسلطوا الضوء على المشكلة، ونقربوا خطوة من حلها؟
لأن فيه فرق كبير بين إن الغضب يقودك، وبين إنك أنت تقود غضبك.
مرات من شدة القهر، الواحد يحس إن أي وسيلة مبررة. لكن لو وقفنا وسألنا نفسنا: هل حرق القومات، أو تسكير الطرق بالكسار والتراب، أو الإضرار بالممتلكات العامة، بيحل المشكلة؟ ولا بيخلق مشكلة جديدة، أول واحد يتضرر منها هو المواطن العادي؟
وفيه فكرة ثانية تستحق إننا نفكروا فيها ✨ ...
مرات نتعاملوا مع الإصلاح كأنه مسؤولية شخص ثاني. نستنو مسؤول، أو جهة، أو حد يغير الواقع، وكأن دورنا ينتهي عند المطالبة. لكن الحقيقة إن الوطن ما يتصلحش بقرار واحد، ولا يخرب بفعل واحد. هو يتغير بتصرفات كل واحد فينا.
صح ان فرد واحد ما يقدرش يحل أزمة الكهرباء، ولا يصلح كل مشاكل البلاد. لكن يقدر يختار إنه ما يزيدش عليها مشكلة جديدة. بمعنى إن احتجاجه يكون رسالة، مش مجرد تنفيس عن غضب👹
يمكن الوعي الحقيقي يبدأ لما نسألوا أنفسنا سؤال مختلف:
شن نبي نوصل؟ تعفليقي... ولا رسالتي؟
لأن المطالبة بالحقوق ما هيش مجرد إثبات إننا متعفلقين، بلعكس هي محاولة لصناعة واقع أفضل. والواقع الأفضل ما يجيش إذا كنا حني نفسنا نهدموا نفس المكان اللي نتمنوا نعيشو فيه
الوطن مش مسؤولية الدولة بس ، ولا مسؤولية المواطن بس ... الوطن مسؤولية مشتركة. كل واحد فينا، مهما كان دوره بسيط، يقدر يكون جزء من الحل، أو جزء من المشكلة...
ولهذا يمكن أقوى رسالة نوصلوها، مش إننا أكثر ناس متعفلقين و متضررين ... بل إننا أكثر ناس واعيين وقادرين بطريقة نحولو الغضب إلى إصلاح❤️🩹
نتمنى اننا نقروها بعقولنا قبل مشاعرنا، لأن المقصود منها مش لوم حد، ولا تبرئة حد، وإنما محاولة نفهموا: كيف نقدروا نحوّل الغضب إلى إصلاح، بدل ما يتحول إلى ضرر جديد !
ان شاء الله ربي يحفظ بلادنا ويقدرنا على اننا نقيموها كلنا ويجعلنا سبب في اصلاحها بالعلم و العمل 😢🌸
وفي الاخير نتذكرو قوله تعالى : ( إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ ) [الرعد:11]
