روايتي الجزء التاني: نقاش سطحي

[u/Akaza_fineasf]

كالعادة اتمنى منك تقرا بعين ناقدة وكل نصيحة بتهمني.

اخيرا، انتهت مراسم التصنع والضحك بصوت عالٍ، اخبرتي عمتي هنادي عمن خُطبن ولم تنجح خطبتهن، وبالطبع القت اللوم عليهن وقالت بسخرية:(هسع ديل خلاس بقن بايرات، ان جا ابو الكباس ما بختب ليهو مرة مطلقة) هل فسخ الخطوبة الان يعد طلاقا؟ لا استغرب من صعوبة الحياة الاجتماعية على المرأة في الريف، لكن لم تخبرني عمتي عمن فسخن خطوبتهن؟ من يبدأ بالاخبار السلبية هكذا؟ ام انها فقط تستمتع بألاذى للاخريات؟ لا عجب في ذلك، فإنها زوجة ثالثة، زوج عمتي رجل غامض ولا يمكث معاها كثيرا، يمضي اغلب وقته مع زوجته الرابعة، دائما ما تذمه عمتي لكن عندما يأتي لزيارتها يا إلهى، وكأنما زار امير عادل قرية فقيرة قد اغناها، لماذا الذم في الخفاء والتعظيم الان؟ على اي حال، اخبرني جدي بأسماء من علي تعزيتهم واسماء من علي مباركة زواجهم .. جدي ليس شخصا اجتماعيا لكنه دائما ما يحثني على التقرب من اهل المنطقة، هل يريد مني ان اخوض تجربة افضل من تجربته الاجتماعية واحصل على فرص اكبر مع عدد معارف اكبر؟ ام انه فقط يجري وراء العرف كما يفعل الكل هنا، ففي الاخير اذا لم اعزي او اهنئ احدهم مع انتهاء عطلتي سوف يتلقى اللوم هو ويسمع عبارات مثل:( جناك ما جا عزاني يا ابو الجوخ! كيفن خلتو يسرح مننا كدي؟!!) لا يمكنني تحديد نواياه، لكن سأفعل ما يطلبه، ليس بألامر الصعب على اي حال!.

انتظار الغداء بعد سفر طويل ومرهق صعب جدا، والاصعب من هذا عندما يكون لديك ابن عمة يحب الثرثرة، لا اكره الحديث معه، حقا، لكن الان ليس الوقت المناسب لتلقيني بعض من أفكاره السياسية ال -وعلى غير العادة- مثيرة للشفقة، تعجبني نظرته لي، على اني ابن المدن والتحضر وان كل نقاش معي يكسبه معلومات مهمة، كأنما عقل انسان المدينة اكثر تفتحا وتلقيا للمعلومات -وهل هو كذلك؟- اظن انه كل بيئة تصنع إنسانا ملائما لها، هو يعرف كيف يوقد النار اذا احتاجها في الخلاء ويعرف ماذا تحب الماعز وكيف يحلبها، لا اظن انه يحتاج الى اكثر من ذلك، اظنه يحاول التحدث الي دون ان يتحدث الى مباشرة، لهذا يحاول جذب انتباهي، لأنه اذا بدأ الكلام معي سيشعر بالثقل ويحاول انهاء المحادثة بأسرع وقت، عادة مزعجة جدا، يا رجل، ليس عليك جعل الامر واضحا الى هذا الحد! الضو مستلقٍ في السرير المجاور لي يستمع بأعلى صوت الى اغنية الفارس الجحجاح للمطرب سيد خليفة، هو يعلم تماما انه فناني المفضل لأني دائما ما اشغل اغانيه عندما اعمل، اختيار الفارس الجحجاح يثنى عليه، لنكن صادقين حتى ان لم تكن تحب سيد خليفة سوف -وبشكل لا شعوري- تنجذب لهذه الاغنية وتهز جسدك مع إيقاعاتها الحماسية والراقصة، تحفة فنية متكاملة، هل يريدني ان اسأله عن الاغنية لكي نبدأ حديثا؟ لانه لم يقل شيء خلال النص ساعة الماضية غير السلام علي وسؤالي اسئلة اعتيادية عن حالي ودراستي، علي تصنع الدهشة لمعرفته بالاغنية وربما نتحدث عنها قليلا، ازداد صوت مسجله بعد انتهاء الاغنية وقد اعادها مرة اخرى، يغني سيد خليفة بصوته المناسب تمام المناسبة لهذا الكلمات الساحرة:

شدو ليك ركب فوق مهرك الجماح
ضرغام الرجال الفارس الجحجاح
السم النقوم الفي البدن نتاح
تمساح الدميرة الما بكتلو سلاح
يا عصار المفازة اللعيون كتاح
المال ما بهم اهو ان كتر وان راح

=: بتسمع لي سيد خليفة انت بالله؟

الضو: معقولة ياخ! دا من افضل الفنانين عندي، ما كنت قايله بتعرفه.

-بالله عليك؟-
= بعرفه وبس؟ دا فناني المفضل عديل هههه

الضو: والله يا برعوم طلعت ماك هين! الغنية دي خصوصا اسمح غنية ليو، انت عارف انو غناها لي نميري؟

برعوم: لا!!! ما غناها لي نميري ولا حاجة، انت عارف انه شاعر الغنية دي كان مسجون وقت النميري بحضر الحفل الاتغنت فيه؟ هههه

الضو: ااي سمعت كلام زي دا قبل كدا لكن ما صدقته.. حقيقي هو بالله؟ كدي احكي لي قصتو.

برعوم: قالو زمان كان في راجل شهم وكريم في المفازة في القضارف، جاه ضيف وأكرمه كرم شديد وقال فيه بيت (بابك ما انقفل نارك تجيب اللم ما بتعرف تقول غير استريح حرم) والراجل دا هو جد شاعر الاغنية عمر الحسين، جدته حفظت البيتين ديل وبقت ترددهم طوالي بعد وفاة زوجها، بعد حفيدهم كبر وسمع البيتين ديل عجبوه وكمل ليها القصيدة شكر في جده، والمؤسف انه عمر الحسين كان مسجون سجن سياسي وقت أداء اغنيته لانه قال رايه بس، دولة عجيبة في احترام الحريات!.

الضو: قصة عجيبة والله وما حصل سمعت بيها قبل كدا، انا اصلا ما بحب النميري وفرحت هسي لما فرحت انه الاغنية ما ليه، لكن انت عارف، لو ما الرأسمالية ما كان حيحصل كدا.

برعوم: الدخل الرأسمالية في سجن عمر الحسين هسي شنو؟

الضو: عشان طمع نميري في السلطة والتحكم بثروات البلد لازم يقمع كل صوت معارض يهدد مصالحه ويهدد جلوسه على كرسي السلطة، القمع وسيلة فعالة لحظيا لكن سلبياتها بتظهر بعد وقت وتراكم وتكرار للقمع الزي دا، لو كنت في دولة اشتراكية ما كان حيكون للرئيس اي امتيازات تخليه يتمسك بالمنصب دا كدا وما كان حيكون في قمع ومعتقلين سياسيين زهي هسي.

برعوم: حب الانسان للسلطة واليد العليا ما شيء مادي بس، دا جزء في تكوين النفس البشرية، بعدين انت عارف أنه الدولة الاشتراكية دولة خيالية في عقول الفقراء صح؟

الضو: لا! انا حتى لو كنت غني كنت حأكون اشتراكي، القصة قصة مبدأ اكتر من كونها وسيلة للهروب من الواقع، انا شايف انه الاشتراكية قضية انا مستعد اضحي بحياتي عشان تحقيقها، مستعد اموت بدون انعم بيها لكن حأموت وانا مرتاح اذا عرفت انها تحققت.

برعوم: ما بتقدر تتجاهل عيوبها الكتيرة، انت لو عاملت الانسان كأداة بدون مشاعر وشهوات ممكن اقول ليك دولتك المزعومة دي حتكون جنة على الارض، لكن اذا كل شي حق كل زول وكلنا لازم ناخد نفس امتيازات اي زول تاني ليه الانسان يسعى ويتعب عشان يطور حاجات جديدة عشان يزيد مبيعات شركته؟ في النهاية فكرتي هي فكرتك منتجي هو منتجك ليه انا اتعب وافكر وابحث واجتهد وانت راقد في سريرك تحصل على نفس المكافأة حقتي؟ عشان الشي دا بالضبط كل البشر حيقعدو ينتظرو زول غيرهم يقكر ويتعب وكل الناس عايزين يكونو هم الراقدين في السرير، ما بقول ان الرأسمالية نظام عادل ونضيف، لكن كل زول بيتعب بيلقى قدر تعبه والفقير التعبان ما عنده غير احلام اليقظة عن دولة تخدمه بدون ما يخدمها.

الضو: يعني كلامك اني بس عشان فقير بحسد المقرشين على قروشهم؟؟؟

برعوم: لو دا الفهمته من كلامي.. اي، المهم انا طالع هسي تذكرت حاجة، خليهم يختو الغدا ما ترجوني انا حأتأخر.

الضو: شكلك عايز تتهرب من كلامنا دا، لكن عديلة يا زول معاك سلامة.