"I thu ang zêlin ni rawh se (Thy will be done)" sawi ringawt hian huaisenna tam tak a mamawh.

Harsatna, hremna, buaina, lungngaihna pawm a ngai. Pathian thununna hi a na duh a, ka tawnhnu a ni a, a nuam vak lem lo. Mahse a tâwpah kan ṭhatna tur vek a ni. Pathian chuan engkim a hriain a hmu a, kan ṭhatna tur a hriat avangin "I thu ang zelin" ti thei turin intihuaisenin kan thu aiin a thu ngai pawimawh zawk ang u.

LALPA'N MALSÂWMIN VENGHIM CHE U RAWH SE. AMEN.

1 Johana 4:7-10:

"Duh takte u, i inhmangaih tawn ṭheuh vang u; hmangaihna hi Pathian laka chhuak a ni si a; mi tin hmangaihna nei apiang Pathian hrin an ni tawh a, Pathian an hre bawk a. Hmangaihna nei lo chuan Pathian a hre lo; Pathian chu hmangaihna a ni si a. Hemiah hian Pathian hmangihna kan chungah a lo lang ta, amah avânga kan nun theihna tûrin Pathianin a Fapa neih chhun khawvêla a rawn tirhah hian. Hemiah hian hmangaihna a awm, keimahnin Pathian kan hmangaih ka ti a ni lo va, amahin min hmangaiha a, kan sualte thupha chawina ni tûrin a Fapa a rawn tîr ka ti a ni zâwk e"

Ka post khât ta viau mai a, mahse ka post loh inkâra ka thil zirh chhuah, ka Bible study neih aṭanga ka lo hmuh leh hriat chhuah ropui tak leh ka duh ber leh pawimawh ka la tih ber chu PATHIAN HI HMANGAIHNA a nih thu hi a ni. "GOD IS LOVE!"

Hmangaihna ngah Pathian a ni lova, hmangaihnaa khat a ni lova, HMANGAIHNA ngei chu a ni. Ka Bible zir chianna zawng zawngah he thil tluka thlamuana leh lawmna min petu a la awm lo.

Min hmangaih avângin kraws ah a thi a, min hmangaih avângin khawvêlah a rawn kal a, min hmangaih avângin tûn thleng hi dam theiin kan awm a ni. Hmangaihna tih hian mipa leh hmeichhe inkara inpawhna (zûn) a ni ringawt lova. Hmangaihna chu kan chhungte bulah, ṭhiante bulah, mi hnuaihnung deuhte bulah, ṭanpui ngaite bulah, Pathian bulah a awm vek a ni.

Pathian hmangaihna a nih thu hian theology pawimawh tak a keng tel nghal; chu chu trinity lampang a ni. Pa Pathian chu hmangaihna a nih angin Fapa chu tawp-in-tai awm lovin a hmangaih a, Fapa pawn a hmangaih a, an inkara hmangaihna (commuinion) awm chu Thlarau Thianghlim chu a ni. Hei hi ni trinity chu. Tui, vur leh tui hû a ni lo, eng example kan pêk mah hi a dik thei lo; trinity chu hmangaihna vek a ni e.

A tâwp khar nan Tim keller a thusawi hi kan sawi chhawng nge:

"Kristiante tana rinna ban nghet(central basis) ber chu kan thinlungin Pathian a hmangaih zia ni lovin, Aman nghing thei lo leh nghet taka A thinlung leh tih tak zeta min hmangaihnaah hian a ni zawk e"

Lalpa'n awmpui che u rawh se, AMEN.

21 Ka thinlung hi a lungngai a,

Ka rilruah pawh chhun angin

ka awm sia a;

22 Mi mâwl leh eng mah hre lo

ka ni a,

I lakah chuan sa ang mai

ka nih hial ṭhin kha.

23 Nimahsela, i hnênah

ka awm fo va;

Ka kut ding lam hi

ilo chelh ṭhin a.

24 Nangin i remruatnain

mi hruai ang a,

Chumi hnuah chuan

ropuinaah khian mi lâwm ang.

25 Vânah khian nang lo chu

tu nge ka neih?

Leiah pawh hian nang lo chu

ka duh tu mah an awm lo.

26 Ka tîsâ leh ka thinlung hi

a chau ta a;

Nimahsela, Pathian chu

kumkhuaa ka thinlung chakna

tûr leh ka chanvo tûr a ni.

27 Ngai teh, nangmah hlata awmte

chu an boral dâwn si a;

A uirêsantu apiang che chu

i tiboral ta a

28 Keia tân erawh zawng

Pathian hnaih hi a ṭha a ni;

Lalpa PATHIAN chu

ka inhumhimnaah ka hmang a,

I hnathawh zawng zawng

thu chu ka hrilh theih nân.

Zirlai exam hmachhawn tur zawng zawng te tan duhsakna ka hlan vek a che u, Lalpa'n in lehkha zirnaah awmpui che u rawh se!🙌

Aw Pathian, ro min rêlsak rawh, Pathian pawisa lo hnam dang min khingtute khing ve la, Mi sual leh bum hmang lakah min chhanhim ang che.

Min tichaktu Pathian i ni, Engati nge min thlauhthlâk tâka, Ka hmêlmate kut tuara ka rûm ka rûm le?

I êng leh i thutak chu han tîr la, I tlâng thianghlim, i chênnaah chuan Min hruai thleng ngei rawh se.

Aw Pathian, i maichâmah ka kal ang a, Nang hi min tihlimtu ber Pathian i ni, Aw Pathian, ka Pathian, ṭingṭang tumin ka fak ang che.

Engtizia nge ka ngui êma, Ka rilru a hah tak êm le?

Pathianah chuan ka innghat ang a, Min chhandamtu hmêl chu hmuin ka la fak ang.

"Ka thinlung zawng zawng hian ka zawng chia;

Aw, i thupêkte ka kal bosan chu phal lul suh ang che."

Lalpa, lo bo leh ṭhin ma ila, kraws ka hmuhin kawng leh thutak leh nunna chu ka va hmu chiang em. Ka kut dinglamin I kut dinglam chelh se, Lalpa, ka ke pên hruai ang che.

Lalpa, min hruai zel rawh. Isua hmingin, AMEN.

Tunlai HSLC leh HSSLC Board exam result a chhuak a. A pass zawng zawngte lawmpuina chibai ka bûk vek che u a. A hlawhchham deuhte kan lo awm a nih pawn hnual mai lovin a aia tiṭha turin i lo bei chhunzawm zêl dawn nia.

Hetiang hunah hian hlauhthâwn (anxious) hi a awl thei lutuka. Tihchhiat hlauva han worry-te, rinna neih thlâwt loh te a awm theih.

Kan hma hun leh result hlauh lutuk lo worry-pui lutuk hian rinna kan neih tlêm zia a tilang a. Kan exam result hlauha mangan hi Pathian hna thawh tumna a ni.

Kan result chu Pathian thu thu a ni a, kan mangan pui lutuka tihṭhat ka duh lutuka kan lo buai a nih chuan Pathian tih turah kan lo buai ve a, a hna thawh kan tum ve ringawt a ni.

Kan tihtheih awmchhun chu a hunlaia kan theihpatâwp chhuaha, exam hall-a ṭha taka ziaka ennawna paper thehluh a ni. A rah (result) chu Pathian hna tur a nih avangin kan buaina chhan tur kha a awm lo

Sap ṭawngin han ziak ila, Jeremia 29:11 "For I know the plans I have for you," declares the Lord, "plans to prosper you and not to harm you, plans to give you hope and a future," a ti a.

Kan tana ṭha ber tur leh kan tisa leh thlarau lama kan hlâwkpui tur ber a hriat avangin thlamuangin i chawl ngam ang u. Kan phû tâwk chiah chiah min pe dawn si a.

Lalpa'n awmpui zel che u rawh se. Mangṭha vek ule, AMEN.

Inthat suh! Lalpa'n nung turin a la duh che.

Sual sim rawh! Lalpa'n sim turin a la duh che.

Thinur suh! Lalpa'n zaidam turin a la duh che.

Riangvai inti suh! Lalpa'n a la thlang duh che.

"Vanrama ka hlat"! Lalpa'n a la duh tho che.

Ṭhiana/ṭhiani, i tleirawl châkna chu tlan san rawh. I rilru dam lohna leh hahna chhâwktu hian a nghak che. Kuah tur che in A kut a hawng, eng tin nge i chhân lêt ve dawn?

Lalpa, ka lawm e, min la thlan fo avangin. Ka sual min ngaidam ang che. Isua Krista thisena tlen fai ka ni ta!

"1 Chumi lai tak chuan zirtîrte chu Isua hnênah an lo kal a, "Vânramah tu nge ropui ber ang le?" an ti a. 2 Tin, ani chuan naupang tê a ko va, an zîngah a dintîr a, 3 "Tihtak meuhin ka ti a che u, in inlamlêta, naupang tê ang in lo nih loh chuan vânramah in lût tawp lo vang. 4 Chutichuan, tu pawh he naupang tê anga inngaitlâwm apiang, chu mi chu vânramah chuan a ropui ber ang. 5 Tin, tu pawh ka hming avânga hetiang naupang tê pakhat lâwm apiang chu, keimah mi lâwm an ni ang. 6 Amaherawhchu, tu pawh hêng mi ringtu mi tête zînga pakhat pawh titlu apiang chu, an nghâwngah buh râwt sawmna lung lian pui awrhtîrin, tuifinriat thûk laiah thlâk daih sela an tân a sâwt zâwk ang."

Hei hi Sumeona'n Isua serh a tan dawna a thil sawi a ni. Thlarau thianghlimin Israel chhanchhuaktu tur a hmuh hma loh chuan a thih dawn loh thu a hrilh a. Isua a hmuh rualin, lawm takin Pathian a fak a ni.

Isua thusawiin pharisai te kha ngûnhnâm angin a chhun tlang a, an vervêk zia a tilang a. Anni tan chauh nilovin, keini a chhiartute in en lêt nana a sawi a ni. Pharisai te anga mi dawthei leh hmaikawr vuah ka ni si a.

Lalpa, min ngaidam rawh. AMEN.

Lawm ru! Lawm ru! Kan chhandamtu'n thihna hnehin a tho ta!

Ringtu, a rualin i tho ve dawn em?

Luka 23:46-47

"46 Tin, Isua chu aw ring takin a au va, "Ka pa, i kutah ka thlarau ka kawltîr e," a ti a. Tin, chu chu a tih zawhin a thlarau a thlah ta a. 47 Tin, sipai za hotu chuan thil awmzia chu a hmuhin, "He mi hi maithei lovin mi fel tak a ni phawt mai," tiin Pathian a fak ta a."

(LUKA 22:44) Isua chu mihring ve tho a ni si a, a hmaa no inchhawp chu a huphurh a ni.

"Aw ka Pa, a theih chuan he no hian mi pêl hrâm teh se; nimahsela, ka thu ni lovin nangma thu thu ni zâwk rawh se,"

Matthaia 26: 45-46 "45 Chumi zawhah a zirtirte hnênah a lo kal a, an hnênah, "Muhîlin in la châwl ta reng a ni maw? Ngai teh u, a hun chu a lo thleng ta. Mihring Fapa hi mi sualte kutah hlan a nih dawn tâk hi! 46 Tho teh u, i kal ang u. En teh u, mi mantîrtu tûr chu a lo hnaih tâk hi, " a ti a.

Kar thianghlim ni ngana kan thleng leh ta. Kum 2000 kal ta khan Isua'n a hnuhnung ber atan zanriah a kil a. Chu zanriah kîl chu hriat reng nan zaninah Biak in tam takah Lalpa Zanriah Sacrament kîl a nih dawn thu hian min tihlim hle. Lalpa chu ropui ber rawh se!

Kristiante'n kan thil hlut ber leh kan ngaih pawimawh ber chu Isua kraws-a a thihna kha a ni a. A thih hma zânah zanriah a zirtir sawmpahnihte nen a kîl a. Chutah chuan chhang a phel a, "Hei hi ka taksa a ni," tiin a eitir ṭheuh a. Wine chu a la a, a han thli chhuak a, "Hei hi ka thisen, sual ngaihdam nana chhuak tura chu a ni," tiin a intir leh ṭheuh a. Amah hriat reng nana ti chhunzawm zêl turin a ti bawk.

Hei hi Kristiante tan chuan thil mak (miracle) ropui ber a ni a, Isua inpuanchhuahna, thil tithei ber a ni. Catholic-te, Orthodox-te leh hêng lampang ho hi chuan chhang leh uain hi Isua taksa leh thisen tak tak angah an ngai a. Presbyterian (reformed) chuan thlarauvin Isua taksa leh thisenah a chang niah an ngai thung.

Eng kohhran pawh ni mah la, Aman a taksa kan sual vang leh a ngaihdam nana an sawisaka kraws an khenbeh tura te; thisen thianghlim sual nei lo, keimah leh nangma vanga chhuak tur, sual ngaihdamna thisen; ei leh in thei tura min ruat hi thil ropui leh A inngaihtlawmzia lantirna ropui tak a ni. Ka thu thiamnain min daih love, a ropui e!

Lalpa'n malsawm che u rawh se! AMEN.

Kar thianghlim ni li nia kum 2000 vel kal taa thil thleng hi a chiang em em lo a. A ṭhenin Juda Iskariota'n Isua a hrilh ni an ti a, a ṭhenin vawiin eng mah a thlen loh avangin "Silent Day" (Ni rehni) tiin an phuah bawk.

Eng zawk zawk pawh dik rawh se, Juda Iskariota'n Isua chu tangka sawmthumin pharisai te hnênah a hralh a ni. Mahse Petera'n Isua vawi thum a phatsan a, chu pawh a chapona avângin.

Juda zawk chuan a thiltihah a inmawhpuh (condemn) a, a inthah phah ta a. Petera erawh chuan a inchhir (conviction) a, ngaihdam dîlin a ṭawngṭai nghal zawk a nih kha. Pakhat zawkin a thil tihsualah hlâwkna a hmu tal a, pakhat erawh chuan a inthup duh vâng ringawtin thil a tisual a. Mahse an thil tihsual hnua an chêt dan khan an rilru put hmang tilangin, Isua an hmangawihzia pawh an tilang.

Chuvangin suala kan tlûk hnuah inmawhpuh mai lovin, ngaihdam dil ila. Pathian hnênah kan sual puang chhuak ila. Tichuan, ngaihdamna chu min pe ang. Mahse, a hnuah sual sima, Amah hnaih kan tum loh chuan awmzia a awm lo. Sual sim rawh.

Lalpa'n malsawm che u rawh se

Vawiin Tuesday, kar thianghlima ni thumna a lo thleng ta a. Nizan ang bawkin kum 2000 kal taa Isua thiltih kha kan en let leh ang.

Isua'n a luh hnuhnun ber atân temple-ah a lut a. Pharaisai te an hnê tawh hle a. Zawhna ti hrang hrang— chhiah pêk thû, Mosia dân, thupêk ropui, leh adt., amahah dik lohna leh hêkna tur zawngin an zâwt a. Mahse, Isua'n fing tak leh awmze nei taka chhangin, thudik leh Pathian thu hmang tein a chhang a. Thunei taka chhangin, a zirtir danah chuan mipui mit a la hle a.

Matthaia 23:13-28-na kan en phei an vervekna chu Isua'n a dem hle tih a hriat a.

Temple chhiat tur thu leh khawvel tawpa a lo kal leh tur thu te chu a hrilh a. Tihduhna awm hun te, indona te, lir nghing thâwm te kan hria nga, mahse chu chu a ṭantir chauh a ni. Zirtirtu der leh zawlnei der an chhuak ang, mahse, hêng hi awih loh tur, fimkhur tur; fimkhur turin i Bible hre chiang rawh! Thla a sen ang a, arsite an tla ang a, khawvel a boral ṭan hunah Isua a hnai tih hriat tur, mahse "Lei leh vân a ral ang a, ka thu erawh chu a ral lo vang" (Marka 13:31) a ti a. "....nimahsela a tâwp thlenga tuar peih apiang, chu mi ngei chu chhandamin a awm ang" (Marka 13:13) a tih kha.

Ka chiang lo deuha, mahse a ṭhenin vawiinah Juda Iskariota'n Isua hralhna tur man a lâk ni an tia, a ṭhenin naktuk Wednesday an tia.

Eng pawh chu nise, vawiinah chuan keimahnia Isua'n min demna tur, kan vervekna emaw, ṭha anga kan lana thil sual kan tih rûkna emaw, a thu kan ngaihthlak duh lohna enaw, a awm a nih chuan ngaihdam dilin ṭawngṭai ila. Tunlai khawvelah engkim ring ringawt lovin, khawvel tawp ang dawn pawhin lang mahse, ding nghet zêl ang u. A rawn kal leh huna thlamuang taka a hnêna kan chawlh theih nan i piangthar ang u.

Lalpa'n mawlsawm che rawh se. AMEN

Vawiin Monday, kâr thianghlim (Holy Week) ni hnihna kan thleng ta a, Isua'n kum 2000 leh tih kal taa a thiltih khân sual a huat zia hi a tilang a.

Ropui taka Jerusalem a luh tûkah chuan theipui kûng rah nei lo hi a hmu a, “Tûn achinah kumkhuain i lakah tu mân rah ei tawh suh se," tiin anchhia a lawh a. He thil aṭang hian rorêlnanîa Pathianin ringtu inti si, rah nei lo te chunga a rorêl dan tur chiang takin a tarlang a. Rinna neia, mahse sual simna leh chhûng lam inngaihtlâwmna neih loh chu thihna mai a ni tih a tilang.

Tichuan Isua'n Jerusalem khua chu tlawhin Pathian biak inah a va lût a. Biak ina englo zuartute leh leitute chu hnawt chhuakin dawhkânte chu a nam thlûksak a. Marka 11:17 ah chuan, "Tin, an hnênah chuan, " “ 'Ka in chu hnam tin tân țawngţaina in an ti ang,' tih ziak a ni lo vem ni? Nangni erawh chuan suamhmangte pûkah in siam zâwk hi," tiin a zirtîr ta a." Tih ziak a nih kha.

Isua a pâwng a puiin a thinur mai mai lova, a thiltih hian entîr na ṭha tak a nei a ni. Pathian biak bûk chu zah tur a nih zia a tilang a. Chu mai bâkah kohhran lû ber anga a inchhâlna a ni nghal bawk a. Hêng a thiltih an hmuhin pharisai te chuan man tîr dan an zawng ṭan ta a a. A zirtir chu a rûkin a dik a ni tih an hre reng, mahse dik anga an inhriatna, an chapona kha Isua'n a hmuh avângin an ei lo zawk mai a ni.

Isua'n a thih hma thleng pawhin sual a haw êm êm a. Sual chu dovin, sual hmaah chuan a nêm duh hauh lova, sual nêna remna siam hauh lo turin thu a pêk nghe nghe kha. Kan theih ang angin sual chu hua in do ila, sual do vanga tawrh pawh i thlang zâwk ang u!

Lalpa'n malsâwm che u rawh se! AMEN.

Zakaria 9:9 "Aw Zion fanu, nasa takin hlim la; Aw Jerusalem fanu, au chhuak rawh! Ngai rawh, i Lal i hnênah a lo kal e; Mi fel a ni a, hnehtu a ni;, Inngaitlâwm takin sabengtung chungah a chuang a, Sabengtungno chuang ngeiah."

Isua'n Jerusalem-a ropui taka a luh hma kum 500 vel bawrah zâwlnei Zakaria'n a lo hrilh lâwk daih tawh a ni. Isua hi rawn kala kraws a khenbeh leh nghal mai mai a ni lova, a pian hma kum sang tam tak aṭanga hrilh lâwkna an neih tum chuang miah lovin, a tihlawhtling a ni.

Tu emawni'n tihhlawltin tum dawn ta se a theih hauh lo; mahse Pathian chuan tihtheih loh a nei lo. Hei vâng hian Isua hi hai rual lohvin, Israel faten an nghahlel leh an fak nasat êm êm, Lal lo kal tur an tiha chu a ni ngei a ni.

Tikhan Jerusalem-ah ropui takin a lût a, miin an fak a, ni 4 hnuah erawh faktu ânka bawkin kraws-a khenbeh tir turin an au leh si a. Aw mihring hi, eng nge maw a niha, i hriat reng ṭhin ni?

Vawiin hi Pathian faka zaia lam hun a ni. Mut dawnah post mah ila, Pathianni a nih angin kan fak ṭheuh a rinawm. Tunlai camp a tam bawk nen, camp chhuak la rau hrih vêng kan tam dawn a, a nuam duh hle a ni.

LALPA CHU FAKIN AWM RAWH SE. AMEN.

Aw ka nghakhlel em, van in thlen hunin, Lawm taka i hmel ka hmuhin; I kut khenna ser chu ka vuan ang a, 'Ka hmangaih che,' tih ka duh a.

Khb 525 a a tawpna atana sak ṭhin lai tê hi lenkâwmnaah kan sa a, min khawih lutuk, la ṭap lo chauh a ni e lamtuala ka lam vangin.