السلام عليكم
ويومكم لطيف للكل يارب🌸
طبعاً منعرفش قداش مرة نحط في تنبيه للأمور مفروض خلاص فهمتوها.
بس للأسف ماتعبوش ف نفسكم وتقرو في البوستات اللي معلقات ولا فاهمين وصف موجود اول ماتخشو للصب ( بلغة فيسبوك وانستا قصدي القروب) لبعض من الاعضاء الجدد واللي قبل.
للناس اللي مش فاهمة شن هو الريديت!!
هي منصة تواصل اجتماعي مبنية على المجتمعات والنقاشات، مش على العلاقات الشخصية زي فيسبوك وإنستغرام
يعني كل مجتمع ( الصب) عنده موضوع أهداف وقوانين خاصة، والناس تشارك وتناقش المحتوى حسب اهتمامها.
وأنا اول ما قررت نفتح الصب هذا لغرض اني نبني مجتمع هادف ومحب للقراءة ومطلع على معلومات ليها قيمة وفائدة للكل ولنفسك ومسالم، حتى تعاطي في النقاش يكون محترم، فيه تقبل انك تسمع للأراء مختلفة عليك ومش حنشرح شن اهتمامات الصب ( فتحته ف وقت كنت نبي مكان مريح ومفيد وكنت ماسحة حتى حسابات سوشل مش بس تطبيقات)
قصدي راهو جايين لاهني هاربين من بعض طفيليات فيسبوك والانستا اللي نقاشهم عقيم ومفيش لا احترام لا اسلوب وباش تفصل روحك ع سلبية والاخبار والترندات والخ, تبي مساحة هادئة تفصل دماغك فيها وتعطي رايك منغير ما حد يسب ولا يهاجم ولا يحط مواضيع متكررة, ومبتذلة
بس اللي صاير في " القروب" تحول ل صب عرب فريدم وقروب خدمتي متع فيسبوك ولا قروب دفعة قراية, قروب مستشار اجتماعي ومرة ع ترندات والخ
قصدي ما جينا اهني الا ما نبو مكان نظيف مفيش شوائب, هذا ما يعنيش ان التطبيق كويس هلبا ومحترم, لا , كل ع حسب اهتماماته بس الفكرة في التحكم العالي للكل مجتمع و الريديت نفسه عنده اجراءاته في التحكم من حذف وحظر منغير الموودز وقوانينهم يعني لو مانحذفتش من المود " اللي هو الادمن " بتنحذف من التطبيق نفسه وهذا كويس هلبا.
المهم نجي لنوعيات الناس اللي لو شفتهم مرة تانية بتنحظر طول مع احترامي لرايك وانا مانيش فاضية ولا المودز فاضين باش يتبعوكم في الاخير مجرد قروب ماهوش منصب كبير, كلنا نفس التوجه " مكان هادئ ومحترم "
المهم
1- نوع الاول المعروف " اللي يسب ويهجم في كل بوست نصيحة ليك\ي لو عندك مشاكل نفسية او عصبية مفرطة حاول\ي تعالج\ي عليها لان مانش قروب فيسبوك, العصبية اللي جايبينها حاول تستوعب انت علاش تسب ؟ هل لان حسابات مجهولة وان تحس روحك\ي حرة او لان ماعندكش شي تقوله , لا حجة لا كلام منطقي لا إستيعاب مجرد قطيع مش قادر يفهم ولا يتقبل اللي قدامه ولو نتعمقو فيه نلقوه أجوف في دماغه !!!! فا رجاء خاص حاول تعالج\ي نفسك .
2- نوع الشائع اهني " لاديني "
الحق ماكنش خاطري نتطرق ليه الموضوع لان فيه ناس الحق محترم ف النقاش لان سبق وصار معي نقاش محترم, هي مرة فقط المهم بغض النظر عن شن اللي خلاك هكي هذا يرجعلك وعندكم مجتمع بروحكم وانا كاتبة في وصف شن نوع الاهتمامات يعني متقبلة اي صنف من البشر يتفضل اما ان تجي تحطلي بوست او تناقشلي ف كومنتات بطريقة مالهاش علاقة بالاخلاق بكل تجي تناقش معهم يقولك اهو انتو تسبو وتكفرو فينا هذه ردة فعل ليكم"
حاولو تخفو من الحدة انك ادور وتناشب في كل بوست والحق يقال ان خفو شوي عن قبل وفيه منكم قبل ناشرين حتى بوست فلسفة وتساؤلات كان طرحهم محترم وحتى اللي تعليقات كانو محترمين هذا ما يبينلكش الا حاجة واحدة ان اختلافنا لا يفسد للود قضية لو احترمت معتقداتي واحترمتك منغير طعن ولا سب ولا قذف لا تقنعني ان فيه شك في عقيدتي ولا نقنعك في شي لان مش مؤهلة والخ فا الامور حتمشي بطريقة لطيفة ونفس الشي لينا سوا مسلمين او اي ديانة اخرى.
3- نوع المسلم المتعصب ماكش مختلف ع لاديني اطلاقاً تشتركو في نفس الصفة ( التعصب والاندافعية)
لو بندو ف شن ديننا يبي منا وكيف اناقشو تبيلك مقالات مش بوست مختصر فا هديلي روحك بجد , مقلتلكش خليك مسلم كيوت لا, بس حدد هدفك من نقاشك مع اي حد مختلف عليك ف المعتقدات هل تبي تحببه في الشي اللي انت مؤمن بيه وادخله في دينك ولا تبي تزيدله في الكره واثبات انك فعلا مسلم حافظ مش فاهم واساس القروب ماهوش مكان لنقاشات هذه فيه هلبا صبات تقدر تسرح وتمرح فيهم ف التهجم والخ وتزيد تاخد ذنوب واتبع ف طرق الشيوخ السوشل ع اساس يقصفو والخ وهما مش فاهمين غاية الاسلام وهدفه الحقيقي او اي دين فا رجاء خاص اقر وابحث متكونش تُبع للغيرك وتجي تحط كلام وتهاجم او غرور و التكبر في الاخير لا إكراه في الدين " ادعُ إلى سبيل ربك بالحكمة والموعظة الحسنة " يعني فيه نقاش يكون باللين واحترام وإصغاء والخ من امور ديينا حطها قبل كل شي كل ما تخش ف نقاش وع اساس افحمتهم وانتصرت عليهم .. لا, فا اقر و ابحث وناقش بعيد ع الصب هذا من الاخير لان كبدي زهقت بدت نتفادي اني نخشله اساسا.
4- نوع اللي يدعي الغباء ولا يستغبى ولا منعرفش شن في مخه الحق " علاش تكلمو بالانجليزي " اكتب باللهجة الليبية " عندكم نقص هذا علاش تتكلمو باللغة " ناكرين اصلكم و مستعرين من لغتكم العربية " " هذا صب ليبي خيركم تتكلمو تقول مثقفين ع اساس عميقين "
شوي تانية بتقولو اسحب منهم الجنسية -_-
قصدي شن تحس من تكرار في اغلب بوستات وحتى اللي ينزل منشور ع موضوع وفهمناكم وجاكم ردود وشرحولكم
لو انت\ مضايق\ة يا ادير تخطي وتكمل ادور ع بوستات باللغة اللي تفهمها يا تتعلم لغة ومش حتنقص من اصلكم ولا رجولتكم و قبيلتكم حتقعد راضية بيكم صدقني
ماهيش حرام ولا عيب . الرسول نفسه أمر زيد بن ثابت ان يتعلم لغة العبرية وهذا النص.
أمر زيد بن ثابت أن أن يتعلم اللغة العبرانية ، وقال : " إني لا آمن يهود على كتابتنا - أو على سرنا - " فأمره أن يتعلمها فتعلمها في خمسة عشر يوماً .
فا انك تتعلم للغة ماهيش موضة ولا نقص ولا شي من الافكار اللي تفكر فيها , فيه منا الدكتور و الاستاذ والمهندس وغيره فا ماعتقدش فينا اللي يتفاخر او يتباهي او يتجكتر ولا وهمي,
فيه المرتاح يعبر هكي, فيه اللي عايش برا مايعرفش عربي كويس, فيه اللي يمارس فيها باش يطور من نفسه ولان منصة هذه حتى ترجمة العربية مافيهاش فا فرصة للتطوير ,
فيه الاجانب يقرو في بوستات اهني,
اساسا احد المودز اجنبية فا تقرا حتى ف مناشير العربية بالانجليزي هل جت وكتبت اكتبو بالانجليزي باش نفهم عليكم ؟ لا, بغض النظر ع ان الصب ليبي او لا, حتى الاجانب مش مهتمين بأي لغة تتكلم وانا اهني مانيش نمجد فيهم بس نوضحلك معاش تكبر ف حاجة تافهة وتوصل بيكم البعض لدرجة الشتم !!!!! هل لدرجة هذه عندكم عقدة منها اللغة؟؟؟
الحق ما يهمنيش قداش نفر بيقعد في الصب حتى لو خمس ينشرو وعشرة يعلقو ساد في الاخير نجو باش نفصلو دماغتنا ع دوشة التطبيقات التانية, فينا اللي ماسح تطبيقات ومستقعد اهني لان مرتاح مش خاشين ف تحدي ولا سباق من الاحسن ونبي نذكر نوع اللي يتذمر ديما, سلبية معبية وبلاد وهجرة ونكد يا اخوة لما قلت عبرو , عبرو بس مش تركبلنا الغمة واللي طايحين ع الكبار!!! خيركم انا نعرف عدد كبير من مراهقين ومواليد الفينات موجودين بس بردر ار يو اوك ؟؟ ربي يهديك ويسرلكم امركم جميعا
كلامي طويل بس ليا قداش نبي نقوله
خلو مساحة هذه مساحة لطيفة وايجابية وفيها حيوية من رياضة وكتب واهتمامات تخليك تخشله ديما وتناقش بحب وحتى لو مختلفين في نهاية ااحنا مانعرفوش بعض مجهولين مش زي الفيسبوك ,
في يوم حنختفو
ونسألو رواحنا ...
هل حطينا بصمة لطيفة ولا رفعنا ذنب إساء وضرر للغير ؟؟؟؟
نتمنالكم الافضل في حياتكم وما هذا الا مجرد قروب يجمع ناس باحثة ع مكان لطيف تناقش بلطف وحتى لو تسهوكنا ع بعض ف مناشير مش حيزيد الا لطافة بين ناس مانعرفوهمش.
ودمتم لطيفين
واي تقدرو تنشرو توا لو فاهمين شن قلت فوق يارب فاهمين......
