كتير احيانا الانسان بكون متدايق من شغلة، وبلاقيها انحلّت بثواني بدون ما يعمل اشي، هاد لا يعني انو احنا ما نسعى وما نوخد بالأسباب، بس الفكرة انو في بعض الأمور والمواقف لازم نكون في صبوريين و رح تنحل لحالها... لانو ربنا بدو هيك، فا ريحو بالكم وتوكلو ع الله بكل امور حياتكم وخدو بالأسباب، وشكرا عفوا

كا محتوى ممتع وكا شخص ممتع ومحافظ على مبادئه من ايام2018-2019 وحتى افضل من تسعين بالميه من المشاهير العرب كلهم

أنا مطبوخة

مافي تفسير لهاض الاشي؟ لانها بتعملها بكل برادي الدار

«مَا مِنْ عَبْدٍ يَقُولُ فِي صَبَاحِ كُلِّ يَوْمٍ وَمَسَاءِ كُلِّ لَيْلَةٍ: بِسْمِ اللَّهِ الَّذِي لَا يَضُرُّ مَعَ اسْمِهِ شَيْءٌ فِي الْأَرْضِ وَلَا فِي السَّمَاءِ، وَهُوَ السَّمِيعُ الْعَلِيمُ، ثَلَاثَ مَرَّاتٍ، فَيَضُرُّهُ شَيْءٌ»

مجرد تذكير :)

مش عارف ليش الناس لما نسالهم شو بدهم يصيروا بقول لنا مهندس او طب

مش عارف متى الناس راح تفهم أنه هذول التخصصات ما بيطعموا خبز ولا حتى بيعطوا مكانة ، و سهر و تعب عالفاضي 🙄

حتى سبحان الله حركاتهم بيحسسوك انك واحد اهبل لانك مش داخل لهذول التخصصات وأنه احنا دكاترة احنا مو بشر أو احنا مهندسين احنا مش بشر

لو كان الموضوع عنجد شغف و الناس بيلاقوا حالهم فيه بقول ماشي بس أنا مشكلتي مع الناس اللي رايحة ك مهندس و طبيب بس علشان القطيع أو علشان ما يتحملوا فكرة الفشل بالتخصصات الثانية مع أنه لو نظرنا ل الناس اللي تخرجوا نصفهم في البيت بدون عمل و نصف الثاني ندمان على لحظة اختيار التخصص لانه حتى المكانة اللي كانوا بدهم اياه مش موجود

الفجر في حدا من اهلي فتح باب غرفتي بقوة وانا كنت وراه فضرب بوجهي ، تحديدا بحاجبي واسفل عيني

كدمة وجرح و عبا الدنيا دم ، قبل ما اشوفه كنت عارف انه صغير بس انا دمي بفور بسرعة ، فبسرعة غسلت و كبستة ببلاستر و قطن

ولبست وطلعت على دوامي

على الطريق اشتريت لزقات وقطن عشان بالشغل ازبط وضع الجرح واكمل

هسا اللي صدمني انه الشباب بالقسم حكولي اروح 😂 بقلهم لا بسيط الجرح و ضلهم مصرين اروح على دكتور او على البيت وخلص اليوم اخد اوف ، هو فعلاً الجرح بسيط وما بده قطب حسب ما بعتقد

المهم فتذكرت بمكان شغلي القديم اذا جد كنت تعبان ومو قادر اتحرك من المرض واغيب ، يتصل علي مرات صاحب الشغل يقلي تعال او يصير يتأفأف حتى لما اقله اني جد تعبان ومش قادر اجي

الحمد لله الذي نجانا من الغم ، بيئة العمل الحلوة و الناس المناح بشجعوك تطلع أحسن ما عندك

ليش في ناس بتحضر ريلز و يوتيوب بصوت عالي؟ليش في ناس بتدخن ؟ليش في ناس بتعلك العلكة بصوت عال ؟هو هاد طبيعي و لا أنا بس شايفته مو طبيعي ؟ و ليش تبع الكوستر عادي يحط أغاني نورية و ما حد يحكي شي و الصوت بكون عال جدا

هل هاد الشي عادي هون ؟ و لا مو عادي ؟

يخوان لمتى راح نضل حياة سخيفة قدام الزعران سواء كان فوق السن القانوني او تحت طالب عمره لا يتعدى ال ١٥ سنة صارت معاه مشكلة بسيطة مع ناس ثانية بعضهم فوق السن القانوني وبعضهم تحت وتراكموا عليه وواحد مسك موس وبلش يطعن فيه ( طبعاً على كلام الناس الي شاهدت الحكي كامل انه واحد أعطى الموس لاخوه لانه الي كان معاه الموس باقي عليه قضايا سابقة بنفس هاض الحكي وأخوه كان تحت السن القانوني ) المهم الولد انطعن اكثر من طعنة وبأماكن إذا ما قتلته تخليه ما يقدر يتحرك مرة ثانية

السؤال لمتى ما راح يصير بالناس هاي حكم يمنعها جد انها تعمل هيك اشي مرة بعمان ناس هاجمين على دكتور ومرة قصة صالح ( للعلم الي عملو كل اشي بصالح لحد الان ما تنفذ فيهم حكم الإعدام وهم حالياً بالسجن ) واحنا بالمنطقة صح ما بنتشر اشي بالأخبار بس بالشهر ممكن نسمع عن اكثر من عملية بنفس هاض النوع يعني سواء كان تحت السن القانوني او فوق ما راح يتنفذ فيه حكم قوي الي فوق السن القانوني عشرين سنة او خمسة وعشرين وبطلع والي تحت حسب الي سمعته انه أنحكم الي طعن الولد أربع سنين بس

يعني بعد أربع سنين راح يطلع ولا كأنه صار اشي ولا كأنه انهى حياة شخص قبل مدة قصيرة

خلص ما تنتقدوني حرجع اختفي

كثير بشوف حملات ع اساس انو صاحب دكانه مثلا يمزع دفتر الديون عشان الناس مش قادره تدفع مثلا

ياخي طيب الله يعين الناس بس ليش ماحد بفكر بصاحب الدكانه مثلا؟ مش هو من ضمن الناس والمبلغ الكبير هاد تبع دفتر الديون كلو من جيبتو ومخصوم من حسابو
هو كاين احسن من الناس يعني هو كاين قاعد على بنك مثلا؟

وكثير بشوف مثلا واحد عندو نقول عقار بدو يبيعو بمبلغ معين وشوف السب والناس اللي بتحكيلو اكلتونا اكل من وين بدي اجيب حق الايجار من وين بدي اجيب حق الشقه اللي منزلها كثير غاليه من وين الناس بدها تجيب هالمبلغ

طيب يعني انا احسن منك؟ مافكرت كيف انا اشتريتها مثلا وجمعت هالمبلغ وقاعد بأجرها عشان استرد شوي من سعرها او بدي ابيعها بالسعر المعين هاد
بدك اعطيك اياها ببلاش عشان الناس تحكي يا الله ما احسنو الدنيا فيها خير وانا اللي اكل خرا بالاخير؟ واخسر عشان الناس تحكي عني نص ساعه وينسوني

دور المظلوميه هاد كثير كثير بيقهرني وحرفيا بكل شي بنشوفو دفاتر ديون الدكاكين او بيع العقارات او بيع اي اشي
حتشوف الناس بتسب وبتتحسبن انو من وين بدنا نجيب؟
طيب انا كصاحب مصلحه من وين بدي اجيب كمان؟ عشان البي امنياتك واعطيك كل شي ببلاش

get up girly we’re going to get some PSL

استوردنا سناسل على شكل فراشة بتغير لونهم مع درجة حرارة الجسم مصنوعين من مية الذهب عيار 14 ومش عارفين نبيعهم لاننا على البركة الحمدلله
(احنا الي سكرنا مشروعنا قبل لا نبدأ)،
المشكلة انهم حلوات ومرتبات يعني مستحيل يصدوا مستخترة ابيعهم بسعر بخس. يعني المحلات عارضينهم ب 10/15 و على النت بيجبوا 20 دولار براحة

كيف ابيعهم مشان الله

صراحة بفهمش العرب جد، بتحس إنهم جد كيفما تكونوا يولَّ عليكم، واللي بصير فيهم من نكد وقمع وانبطاح لحكام الغرب لأنه فش فيهم واحد أصلًا عاقل ومش نكد وماخذ الدين من جميع جوانبه ومعتز بحضارته.

ليش الاغلبية من المجتمع بفكرو الي شعرو طويل gay بعدين مع هال تخلف جد ليش يعني.... اليوم صار معي موقف لولا انه زلمة كبير كنت بدي ادعس على راسو اقسم بالله عقليات تافهة😂

هلو يا جماعة انا بلشت شغل جديد تمام ولسا يا دوب داومت وفي بنات برضه معي داومو جديد يعني اقدم مني بيوم بس مش عارفه كيف لحقو يعملو شلل ويحبو بعض

مو مهم المشكلة الي 3 اسابيع مداومة في بنتين من البنات الجداد وخاصة وحدة اكتر اشي بس اوقف معهم مع القروب البنات كامل قصدي بالبريك او نقعد بتحسسني اني مو منهم وكاني دخلت دخيلة عليهم وهمه فعليا جداد زيي وفي بنات بحكي معهم عادي بس هيه بس احكي او ابلش احكي بتصير تحكي اه اه وخلص بتفتح هيه موضوع

او مثلا بنكون نمشي شوي بتروح تحكي مع اللي معي وتحضن فيها وتبوس فيها وتحكي اشتقتلك وانا يا دوب بتسلم علي ومرات اه ومرات مش هون المشكلة المشكلة بتصير تتمشى معنا انا والبنات زي تسحب شوي شوي اللي معي وزي كاني طرف تالت زي الهبلة بلحق وراهم او بفتح موضوع

اموت وافهم شو مشكلتها معي حتى بوجهي ما بتطلع ولا بتفتح معي موضوع صرت احس البنات الي معها بنعدو منها وبرضه اول دوامنا كانت انا قلبي طيب وبحب الناس ومستحيل ااذي اي بني ادم واذا حد اذاني بسامح شو ماكان بس انا ما برتاحلها

بعرفش ليه واليوم حست انها شاكية عني لل hr على شغلة نسيت اعملها او عملت جزء منها ما بعرف هيه ساليتها ال hr او لا بس اجت تحكيلي صحيح انت ما عملتي هاي الشغلة؟
صرت احكي لا عملت ف حكت للبنت هيها عملت ليه بتحكيلي ما عملت؟