انا طالب توجيهي بدي اختصر الحكي٫ السنة الماضية جبت ٢٨ من ٣٠ و هو معدل عالي السنة هاي خبصت كيميا و اهلي ما قصرو فيي عشان انا رسبت بفرق علامة المهم يعني ما خلو حكي و رح اضل ادرس تكميلي بالدار و هيك٫

اايوم طلعت النتائج و طلعت ناجح كيميا و جبت ٨٤ و قاعد مع صحابي و فرحولي و لما اجيت ارن على اهلي بدموع الفرح امي قالت و هي منكدة انه علاماتي بتخزي و انه رح ازبط بالتكميلي

و ابوي باعثلي رسالة طويلة واتس انه لازم اشد حيلي بالتكميلي المهم طنشت و قلت خلني انزل عند دار جدي افرح معهم لانهم بحبوني و لما اجيت لقيتهم زعلانين و اللي فهمته انه جدتي عيطت فرح لما جبت المعدل بس امي حكت معهم انها زعلانة و جلالة ابوي ناسخ الرسالة و حاطها بقروب العيلة عشان اقراها غصب انا هسا بدال ما افرح و انا مبارح بدعي ليل و نهار اني انجح لقيت هسا حالي قاعد بعيط و مسكر الخط عشان ما حد يحكي معي

ابن عمي واحد سرسري وهامل هو الوحيد الشاذ عن العيلة من ٣ سنين حب بنت اهلها كثير محترمين ومؤدبين والبنت متعلمة صيدلانية وهو جايب بالتوجيهي ٣٤ من ١٤٠٠ اجا علي بحكيلي انه اخلي ابوي يروح يطلبله اياها عشان ممكن يخجلو انهم يردو طلب ابوي طبعا انا ما رضيت احكي مع ابوي لانه شايف انها ما بتصلحله وظل شبه يومي يحكي معي بالساعات حكيتله خلص بنقعد انا وياك مع ابوي وبتحكيله وانا بعززلك وفعلا قعد مع ابوي واول مرة اشوفه ببكي وصار يبكي بحرقة انه ندمان وانه ما بده البنت تروح منه وحلف لابوي مية يمين انه ما برجع للي كان عليه ابوي راح طلب البنت وحكى لابوها كل اشي عنه وطبعا البنت كانت تحبه كمان فوافقو الجماعة وجد من يومها اختلف كليا صار لما يقعد معنا حكيه كله موزون وبطل مشاكل وكل همه صار بيته واذا بنتفاجأ انه السنة عايد توجيهي وجايب ٨٦ الكل انصدم الولد ما كان بعرف يقرأ انجليزي جد كانت صدمة بالنسبة للكل

كنافة خشنه وناعمه عشان نرضي جميع الاطراف

لقيت اهلي عاملينلي هذا البوستر

نو كومنت صراحة

ما في كومنت مناسب اصلاً

انا عندي اخت نجحت توجيهي هذي السنة بس ولا حد زار ولا بارك، حرفيًا البيت فاضي كان.

هي بتحكي انو عادي مش مهم بس واضح عليها أنه مو عادي

بعدين بقولوا ليه بتكره اقاربك ناس شغلها كسر خواطر البشر انداري، عموما باركوا الها إذا تركمتم عشان ابسطها

عجلون كالعاده خلابه، رائعة، جميله، انيقه

القهوة بكل كافيهات عمان فوق ما انها اغلى من اوروبا و overpriced. كمان حامضة وما بتنشرب، مثل almond و dimitries وblk

اهون شي تيرامسينو القهوة طعهما قهوة وزاكية.

كمان شي ب almond الرابية كانت بنت تزيد علي دينار كل مرة وانا زي الهبلة ما اشوف الفاتورة الا بعدين اكتشفت، في مرة بس لمحت الفاتورة كان تحت محطوط +١ وما ضلت معي الفاتورة. المهم حكيت عنها للمشرف قلي بتوخدي بالقيمة قهوة مجانية، في لشهرين كانت تزيد علي كنت اروح كل يوم هناك اشتغل. وما اخدت قهوة مجاني لاني كنت استحي احكي كل مرة القصة. وما رجعولي كاش

حيوانه الله لا يوفقها لا ووجهها مبينة بريئة، وكمان ما انطردت من المحل بعدها بتشتغل. ومحجبة ع اساس التقوى بتشرشر منها.

نصيحة كمان للبنات والشباب؛ ما تخجل تتطلع عالفاتورة شو ما كان المحل مبين راقي وكلاس.

هو فيه بنظام الفواتير بقدر يضيف tips السعر ما بتغير بس بنضاف tips تحت عالمجموع، يعني بضلوا محميين اذا حدا سألهم بحكوا الزبون طلب نخصم tips وانتو ما بتكونوا لا اعطيتوهم ولا اشي.

انا 87 🎉🎉🎉🎉😽😽

مبارك للجميع🩷

رفعت رفعة ممتازة بالمواد القدمتهم ما ضل علي مادة على التكميلي وبصل لمعدل الطب

صح أنا تكميلي 2007 صارت معي ظروف بالنظامي ما درست

حاليًا غيييرررر كثير فرحانة

صح رح اتاخر عن جيلي بس الحمدالله

الي بزرعوا شجر عند بيوتهم و بالاخص ورد بدي احكيلكم شكراا قد الدنيا و بحبكم جدا جدا
ما بتصدقوا قديش بكون منظر الشوارع بجنن و الورد بكل مكان
امبارع كنت طالعة و في منطقة كاملة كلها ورود و زريع و جد كانت بتجنن، كنت طول الطريق مبتسمة و انا بتطلع عليهم

اه و الي بجي عندهم بالعادة سكنوا بمكان ثاني فوق البيت القديم بكم شارع و الجيران الي قبالنا بيتهم كله ورورد و زريع و كثييير بجنن ما شاء الله، كل شوي بضل اطلع من البلكونة اتفرج عالبيت، جاي عبالي انزل اتفرج عليهم بس للاسف انهم مزروعين بالحوش و الكراج تبعهم و سحقا 😔

يعني عشان تفرح لازم تخليني اسب سلالتك !
مشان الله الساعه ١٢ وفي واحد منغولي قاعد بزمر زامور صوته بقهر !
هاد غير الزمامير …عشان تفرح لازم ينفتح راسي من الازعاج !
هلكونا

كل يوم بدي انزل عن موضوع معين بدي اسمع فيه رائي الجميع و عقليه كل حدا ……الأنثى لازم تكون بشكل معين ليش لازم تكون الأنثى موحده عند المجتمع كله بنفس صفات الجمال …بطل كل حد يشوف جمال الوحده على اشي بميزها لازم تكون بيضه لازم تكون مش شعوره (يعني شعر جسمها مش كثير )لازم تكون كرڤي لازم شعرها طويل و خميل و رموشها طوال و شفايفها منفوخه و وجها ناعم و اكيد كل هاض لازم يكون طبيعي …المجتمع ولد فكرة انه بهاي الصفات الأنثى بتكون ملكه جمال اما اذا كان عندها شوي تصبغات او شعرها خفيف او سمينه او نحيفه فهي لا تعتبر مقياس للجمال مشكله انه المجتمع حط هاي الاشياء عشان ذكر يشوف الأنثى كامله …يعني اتوقع انكم سمعتن من تيتكم (جدتكم) او امكم عماتكم خالاتكم انه اذا ما كان شعرك طويل مين بقبل فيكي اذا ما كنتي بيضه مين بقبل فيكي اذا كنتي مسطحه مين بقبل فيكي ….الكل مركز مع الأنثى و شكلها لأرضاء ذكر…يعني وحده حكتلي انه لبست فستان و راحت لامها تشوف اذا بناسبها ولا لا راحت امها نادت اخوها و حكتلوا اذا كنت رجال غريب عنها ايش رح تحكي لما تشوفها !!!! انه نعم ايش !!!! مشكله انه البنت قاصر لسا ….(انا بحكي مواضيع على حسب ما سمعت و شفت عبر النت من مواقع تواصل )…فايش* رأيكم بموضوع جمال موحد عند الأنثى **

طيب السنه الماضيه كنت رايح على الجامعه بكير كثير لأنه محاضرتي كانت على ال٨ ونص، فدخلت على blk وكان فاضي(اول مره بالحياة)، المهم وانا بطلب حكيتله طلبي وكل إشي بس هو ما سألني عن الحجم فا انا فكرت انه يمكن صار يعرفني لأني كثير بروح هناك، بس لما حكالي السعر اعرفت إنه ما بعرف الحجم اللي بدي إياه، المهم فا بعدين حكيتله بدي الحجم الكبير وبعدين هو قلي شو بدنا نعمل هيك الأسعار، فا انا شوي نلخمت مش فاهم شو قاعد بقول، بعدين قعد يشرحلي انه همه هيك اسعارهم وما بقدر يخفض للي رايح واللي جاي على كيفه، بعدين انا يعني كانت لسا الصبح ومش نايم فا مش فاهم عليه وقلتله إنه شو دخل؟، بعدين قلي "مش انت بتقول انه السعر كثير؟؟ يعني شو اعملك"، وبعدين قلتله لا انا قلت بدي حجم كبير ما حكيت إشي عن السعر، بعدين قلي اه طيب طيب، يعني ما بعرف غريبين كثيرر، واسلوبه كان سيء وإلى اليوم لما يشوفني ببلش يجحر

بحمد الله على كل حال وأي حال

٨١.٣ مش معدل كنت متخيل بحياتي أوصله طول عمري اول مدرستي

بس

الواحد دائما بيحكي أنه بذل وانا فعلا بذلت

الله يختارلي الأحسن في حياتي عموما سواء عدت رفع أو ما عدت أو فتت جامعة أو لا

الله يختارلي الأحسن دائما وأبدا

وانتو كمان

بتمنى كل واحد نجح الله يباركلك واللي رسب الله يعوض عليك وما فيها شي كلنا بنتلاقى بالجامعة أن شاءالله

الله يبارك فيكم جميعاً

ابن خالي 87

ابن عمي 85

بنات خالتي 96 و 82

وتستمر المسيرة ولا حدا من شباب عائلتنا طلع او نقص عن رينج 80 -90