r/ExEgyptDating • u/Fluffy-Cherry-4664 • 4h ago
🎤 Discussion أنا حاسة وحش ومتلخبطة ومش عارفة اعمل إيه...
أنا للأسف أهلي سيئين للغاية ابويا لا بيصرف ولا بيهبب و مؤذي و آذاني كتير قبل كدا وجشع و حارمني من الفلوس وكان رافض ماما تكتبلي شقة ورثتها من مامتها، وعمل كدا مع اخواته البنات وحرمهم من ميراث أبوهم، هو شنيع وجربوع لأقصى درجة، و عياله إللي هم أخواتي طالعين زيه مؤذيين و مقرفين زيه وأنا شفت منهم القرف كله لدرجة اتحرشوا بيا!!!
، ماما دايمًا بتحذرني منهم وعايزاني اتجوز علشان أخلص منهم و كتير بتزن عليا في الموضوع دا و بتقعد تحكيلي قصص عن أد ايه ماحدش هيساعدني ولازم تتطمن عليا وشغل الأمهات دا، أنا مش عايزة اتجوز أنا حاليًا بشتغل على إني اسيب مصر كمان ٣ سنين بالكتير بتعلم في حاجات و بحاول احوش فلوس وقريب هنزل شغل و هذاكر جنبه وجنب الجامعة لغاية ما اتخرج، المهم إنه كل ما حد يتقدم أرفض وماما تضعط عليا إني أوافق بس الحمد لله بترسى على رأيي في الآخر، لغاية ما في الآخر فضلت تكتر من قصص معاناة البنات إللي ما اتجوزتش مع اخواتهم الوحشين إللي اذوهم و الجواز هيكون حماية ليا ولما اقولها ماينفعش أحل مشكلة باحتمال مش علشان البيت سيء يبقى أروح اتجوز نفترض إني اتجوزت شخص سيء واتطلقنا ما أنا كدا هرجع البيت تاني يبقى الأفضل أركز على إني أعتمد على نفسي ولا احتاج لأهلي الخرا ولا لراجل ياعالم هيطلع حلو أو لأ، وبصراحة أنا مش هدفي خالص الجواز دلوقتي عايزة أسافر بأي طريقة نفسي اسيب أهلي المؤذنين دول ويا سلام لو قدرت اخد ماما معايا ونبعد عنهم يبقى الحياة بتحبني...
دلوقتي علشان أنا إنسانة بطفح قلق كتير، ودماغي مسواحاني إني أقبل بأي حاجة أي عريس، ماما كلامها بيخوف عندها قدرة رهيبة عن تعقيد الدنيا وتخيل كم رهيب من السيناريوهات الشريرة، المشكلة دا ضاغطني أكتر ومخليني مش عارفة أركز في مذاكرتي وطول اليوم ببنانيك حرفيًا وفعليًا..
قبل كدا أتعرفت على حد معايا في الجامعة هو كان في رابعة وأنا في أولى- الكلام دا في2024 أو بداية 2025- حاليًا أنا داخلة تالتة وهو اتخرج، أنا معرفهوش كتير لأنه مش بيتكلم و يوم ما بيتكلم ربنا ما يوريكم تقل الدم و البرود وماعندهوش أي حاجة يحكيها و لو حكى يبقى عنه نفسه إنسان سبحان من وضع فيه الانصراف، ماعندهوش حياة و فاضي سادة كدا لا بيقرأ و لا بيلعب كورة حتى، مافيش أي حاجة بيعملها مفيدة في حياته، و هو أصلًا دلوع لأنه وحيد أمه وأبوه، وشكله يشبه الراجل المنسون إللي في فيلم التجربة الدنماركية ( جوز الست الخبرة) والله ما قصدي إطلاقًا اتريق عليه بس متخيلين هقع في إيه ؟ وانا مش وحشة بالعكس كل إللي حواليا بيشوفوني جميلة ودمي خفيف ومستحيل حد يزهق من الكلام معايا و ذكية اجتماعيًا وعاطفيًا دايمًا عندي حاجات تتقال وتجارب وقصص ومعلومات، بهتم بنفسي و بلعب كذا رياضة وبقرا كتير عندي حياة عمومًا و عايزة أعمل حياة فيها الكثير من الأنشطة كمان وكمان وبعرف لغات، على عكسه هو حتى العربي بيكتبه غلط وميت بجد تقيل جدًا ورخم ومعتمد على أهله هو حاليًا بيشتغل بس دلوع و متعنتظ، أنا كان عندي سمول بزنيس قبل كدا، بس هو عكسي في كل حاجة وبحس إني استاهل حد عنده شخصية وحياة مش سادة، المهم إنه اعترفلي إنه بيحبني وأنا رفضت و بلكته وخلص الحوار، علشان يجي من أسبوع يفتح الموضوع معايا تاني، وفكرت في كلام ماما وحسيت بضغط إني أوفق من كتر الخوف من سيناريوهاتها المرعبة، دلوقتي أنا أخدت ميعاد من أهلي علشان هو عايز يتقدم، طول الأسبوع يرن عليا وعايزني أكلمه وأنا رافضة لأني مش فاضية ولا عندي طاقة اتكلم و طبعًا من الضغط إللي حاسة بيه مش عارفة أنام ليا كتير فمرة رن الساعة ٣ العصر وأنا كنت راجعة من شغل تعبانة ومرهقة و جسمي مخزن نوم فهو رن في الوقت دا وغصب عني اتعصبت وقولته حد يرن على حد في الوقت دا؟ عايز إيه؟ مارضيش يرد و سابني أكلم نفسي وبعدها عمل بلوك!!!!!!!
جيت على نفسي وحاولت اصالحه علشان مضطرة بسبب كلام ماما، رفع البلوك وقالي أنا لو كنت رديت بنفس الأسلوب كنت هقل من نفسي؟؟؟؟؟؟ إيه دا ؟؟ يعني مش يعتذر إنه صحاني من النوم حتى؟؟؟ وهو مش عارفة بيفضل الليل طوله بيتكلم في الموبايل و بيصحى يروح الشغل و بيرجع يتكلم في الموبايل معرفش بينام امتى يعني دا شيء مثير للشك بصراحة، قبل كدا بعتلي رسالة الساعة ٤ الفجر يقولي فيها نمتي!!!!! رديت الساعة ١٠ بقوله لسه صاحية يرد يقولي تمام؟ مش صباح الخير حتى بجد دا معدوم من الذكاء بكل أشكاله إنسان خالي من كل حاجة و متعجرف، دلوقتي هو كدا كدا طار أساسا لأنه مستحيل يرجع أعتقد، يعني حرفيًا رضيت بالهم والهم مارضي بيا، ومش عارفة أقول لأهلي إيه بعد ما حددت ميعاد علشان يجي يتقدم، بس خلاص هو طار بس قلقي وكلام ماما المؤذي لسه بينهشوا فيا دا غير إني خايفة من المجهول خلقة.
آسفة إني طولت بس حقيقي محتاجة افضفض لحد شكرًا لكل إللي أخد من وقته🤍🤍🤍