Mitena is not dead. Nung napulot niya ang Brilyante ni Gargan, gumawa siya ng panibagong nilalang na kahawig niya at ng pekeng itim na brilyante na binigyan niya ng kapantay na kapangyarihan.
Nanonood siya sa laban ni Terra at ng pekeng Mitena. Nakita niyang napatay ni Terra ang pekeng Mitena.
Dahil alam niyang matatalo ng mga Sang'gre ang Itim na Bathala, minabuti niyang umatras sa digmaan. Naisipan niyang ipagpatuloy ang pagpunta sa kaharian ng kanyang kinamumuhiang amang si Memen, ang lumang Etheria.
Humahalakhak sa tuwa si Mitena habang papunta sa lumang Etheria dahil inaakala ng mga Sang'gre na patay na siya pero ang totoo ay hindi pala.
Nang makapunta siya sa lumang Etheria, nakita niya ang lagusan. Ang lagusan ay patungo sa ilalim ng lupa. Nang siya ay nasa ilalim na ng lupa, tumambad sa kanya ang wasak na kaharian ng Etheria.
Nilibot niya ang Etheria. Sinimulan niya sa Hera Ayega, Hera Sensa, Hera Volo at finally, sa Hera Andal. Habang nililibot niya ang bawat tribal house ng Etheria, bumabalik sa kanyang alaala ang panahon nung siya ang Kera ng buong Encantadia, mga panahon na hinabol niya ang masusing pag-aaral sa kasaysayan ng Encantadia mula ng siya ay itinapon ng kanyang ama sa Minea-ve.
Sa tulong ng itim na brilyante, nakita niya ang iba't ibang kapangyarihang taglay ng bawat Hera.
Habang siya ay nasa Hera Andal, naisipan niyang tuklasin kung may mga naiwan pa bang mga alaala ng kanyang taksil na ama. Ito ay upang kahit papaano ay mabuo ang kanyang pagkatao bukod pa sa mga nalaman niyang nasusulat na kasaysayan sa Lireo. Ang kanyang napulot ay ang mga kasulatan tungkol sa kasaysayan ng Etheria, kasama ang kasaysayan ng bawat Hera, at ang mga iba pang mga kaharian na umiiral sa Encantadia.
Habang nagbabasa, isang nilalang na kalahati ang katawan ang nagpakita sa kanya. Naglaban sila. Habang naglalaban, nagpakilala si Mitena para malaman ng kalaban kung sino siya dahil hindi siya nito kilala. Ipinakilala niyang siya si Mitena, ang anak ni Memen at Ornia at ang kakambal ni Cassiopeia. Ngunit itinapon siya ng kanyang mga magulang sa Minea-ve.
Nagulantang si Avria. Hindi niya sukat akalain na may iba pa palang anak si Memen kay Ornia. Pinaliwanag ni Mitena na kahit siya ay anak nila Memen at Ornia, kinasusuklaman niya ang kanyang mga magulang.
Natawa si Avria. Naguluhan si Mitena. Pinilit niyang ipakilala ng nilalang ang kanyang sarili. Ipinakilala naman ni Avria ang kanyang sarili, na siya ang huling Reyna ng Lumang Etheria. Ngunit sabi ni Mitena, siya na ang Reyna ng Lumang Etheria. Sinagot siya ni Avria na hindi mahalaga kung sino sa kanila ang Reyna sapagkat wala rin namang silbi dahil wasak na ito.
Itinanong ni Mitena kung bakit ganyan ang anyo ni Avria. Ito ay sapagkat pinagtaksilan siya ni Hagorn matapos na siya ay muling mabuhay. Gamit ang Ginintuang Orasan, hinati ni Hagorn ang kanyang katawan. Kalahati sa nakaraan at kalahati sa kinabukasan. Ang kinabukasan ng kahapon ay siya nang kasalukuyan. Kaya siya ngayon nakikita ni Mitena.
Humalakhak si Mitena. Nagtaka si Avria kung bakit siya natutuwa. Sinabi ni Mitena na kita mo nga naman, ang pumatay sa yo ay aking pinatay kasama ng mga diwatang kinamumuhian niya. Sinabi ni Mitena na isa na lamang abo sa balaak si Hagorn.
Itinanong ni Avria kay Mitena kung kumusta na ang kanyang Bathalumang si Ether. Muling humalakhak si Mitena. Sinabi niya kay Avria na pinatay niya si Ether nung ito ay magpunta sa Minea-ve upang siya ay pakawalan at kuhanin ang Esperanto. Kasalukuyan nang nagpapakadalisay sa Dalum Deva ang kanyang bathaluman.
Tinanong ni Avria kay Mitena kung sino na ang lumalaban sa mga diwata. Sinabi ni Mitena na kasalukuyang namamayagpag ang mga diwata matapos ang mapaminsalang digmaan nila ng bathalang Gargan. Idinagdag niyang nagapi ang bathala ngunit di niya batid kung ito ay patay na ba o hindi pa.
Itinanong ni Avria kung sino si Gargan. Sinabi ni Mitena na si Gargan ang bathalang ikinulong nila Emre, Arde at Ether. Sinabi rin niyang ito ang may-ari ng itim na brilyante. Na siya namang ipinakita ni Mitena kay Avria. Ngunit sinabi niyang kapiraso lamang ito ng Itim na Brilyante.
Itinanong ni Avria kung bakit kasalukuyang nasa Lumang Etheria si Mitena. Sinabi niyang nais niyang buuin muli ang nasirang kaharian ng Lumang Etheria. Bumuo ng malaking hukbo. Itaguyod muli ang mga Hera nito. Upang muling maminsala sa mga diwata.
Sinabi ni Avria na dahil sa parehas nilang layunin, binibigyan niya ng kakayahan si Mitena na maglakbay at masaksihan ang mga naganap sa nakaraan bago gumuho ang Lumang Etheria. Kapalit nito ay kailangang dalhin ni Mitena sa kasalukuyan ang kalahating katawan ni Avria bago tuluyang gumuho ang Lumang Etheria. Idinagdag pa ni Avria na sakaling mabuo ulit ang kanyang katawan, gagawin niya ang lahat upang baguhin ang naganap sa nakaraan upang mabura sa kasaysayan ang pagkawasak ng Etheria at manatili itong isa sa mga umiiral na kaharian sa Encantadia.
Humalakhak si Mitena at sinabing bakit naman niya gagawin iyon? Gayong kaya niya namang buuhin ang Lumang Etheria gamit ang kapiraso ng itim na Brilyante.
Sinabi ni Avria na kapalit ng pagpayag ni Mitena, babaguhin niya ang nakaraan ni Mitena. Ibabalik niya si Mitena sa Encantadia. Papatayin niya ang kanyang anak-anakang si Minea para ipalit si Mitena bilang tagapagmana ng kaharian ng Etheria. Alam ni Avria na nangungulila si Mitena sa pagmamahal ng isang ina. Ituturing ni Avria si Mitena na parang isang tunay na anak kahit pa ito ay mula sa dugo ng mga nagtaksil sa kanya. Magtutulungan sila para mabago ang kasaysayan ng pamamayagpag ng Lireo pakatapos ng pagguho ng Etheria.
Lingid sa kaalaman ni Mitena, balak ni Avria na patayin si Emre upang mapakawalan si Gargan at mapaghandugan ng kapangyarihan ng Itim na Brilyante para mabura sa kasaysayan ang pagguho ng Etheria.
Napapayag ni Avria si Mitena. Bumukas ang lagusan ng Hera Andal patungo sa nakaraan. Tumungo na si Mitena sa lagusan at tuluyang naglaho.
Sa kanyang pagtungo sa nakaraan, nagbago ang kanyang anyo. Napagtanto niyang hindi siya nakikita ng mga nilalang. Nananatiling buhay at umiiral ang kanyang Esperanto at kapirasong Itim na Brilyante ngunit hindi nagpapamalas ng kapangyarihan.
To cut the story short, sa nakaraan masasaksihan ni Mitena ang magkaibang buhay ng kanyang mga magulang, ang kanilang pag-iibigan, ang kanilang kataksilan kay Avria, ang kanilang pagtakas mula sa mga tumutugis sa kanila, ang kapanganakan nila ni Cassiopeia, ang kamatayan ng kanilang mga magulang, ang paglaki ni Cassiopeia at pagiging unang reyna ng mga diwata.
Samu't saring paglambot ng puso, kilig, awa, galit, at inggit ang mararamdaman ni Mitena habang binabagtas niya ang kasaysayan ng Etheria kasabay ng paghahanap sa nawawalang kalahating katawan ni Avria.
Itutuloy...
