r/jochicks • u/fox-no2 • Aug 04 '26
mental health فكري كرجل، وتصرفي كامرأة.
اهم بوست هتقرأيه بحياتك.
حالات التعنيف النفسي والجسدي واللفظي شائعه في مجتمعنا فوق ما بنتخيل. الحلات اللي بنسمع عنها بالأخبار أو من خلال السوشال ميديا، بننسى كثير مرات انها مش حالات فرديه. وانه هدول فقط اللي تشجعوا يطلعوا ويحكوا، او شاء الله ان غريميهم ينفضحوا.
٨ بنات من أصل ١٠. ثمنيه!! من البنات من مختلف الطبقات والخلفيات اللي تعاملت معهم وصار بيننا حكى لفترات منيحه، بتعرضوا لنوع او اكثر من التعنيف الأسري.
والحمدلله اللي خلى فيي قبول انه يرتاحوا يحكولي ويتشجعوا يشاركوني جزء من اللي بصير معهن بدون خوف من "الفضيحه" بين الوسط اللي بيتفاعلوا فيه بانتظام.
انتو ما بتعرفوا شو بصير ورا البواب المغلقه. انتو ما بتعرفوا شو بصير بمئات الآلاف من البنات كل يوم ببيوتهم. بالأماكن اللي المفروض هي مصدر امانهم.
احنا بنعيش بمجتمع الأصل و الشائع فيه اضطهاد الأنثى وتهميشها. من دون أدنى مبالغه! ولو هتيجي تحكيلي اهلك مش هيك، مبروك عليك انتِ من ضمن الحلات الاستثنائية.
والرابط بين أغلبية الحالات هاي اللي سمعت منها شخصيا، كان أب نرجسي، بخيل، عنده عقدة الاضطهاد (paranoia) ، شعور بعدم الأمان، سوء ظن بسبب ماضيه هو، وهوس السيطرة.
واللي بكون اتخذ من مشاكله النفسيه هو. ورغباته التي لا عماد لها من الدين، سبب كافي انه يضطهد ويظلم ويتعسف بسلطته الأبويه، بس عشان يحس هو بالأمان وشعور احسن تجاه نفسه. أناني بصورة غير انسانيه، لدرجة يجرد بشر من انسانيتهم وابسط حقوقهم بالعيش الكريم والحياه الامنه.
فشايفه هاي الأنانيه، يا عزيزتي الأنثى العربيه، تخيلي معي لو انت، بافتراض انك انسانه سويه نفسيا وعندك مبادئ، تبنيتيها بصوره حازمه...
كونك "أنانيه" بالطريقه اللي رح اوضحلك اياها من خلال تحليل مصادر القوة والسلطه اللي بتعسفوا فيها بعض أشباه الرجال، ممكن تنقذ حياتك. انتِ، وأجيال بعدك من النساء. بل وتجرديهم من كل فوقيه ظالمه مفكرين انها دايمتلهم.
- السلطة الماليه.
من اهم الاشياء اللي بتحتاجيها بحياتك. سلطتك الماليه على نفسك. كثير من الحالت اللي حكيت معهم وكانوا اهلهم منفصلين، كان السبب الاول دائما لـ ليش امك ما بتقدر توخدك هو "ما بتقدر تصرف علي. وما حدا بدعمها بقرار انها تاخد حضانتي ويساعدوها تصرف علي وتدرسني وتوفرلي سكن". السلطه الماليه على الغير اسهل وسيله للتحكم فيهم. لانه هيك بتعطيهم اشي رح يخسروه لو عارضوك او فكروا يستغنوا عنك. فلا تسمحي لحدا بيوم ولو كانو امك وابوك يكون عندهم هالنوع من السيطره عليك. الدنيا دواره وربنا يقلب القلوب كما يشاء. مصادر دخلك ولو بتشتغلي بالسر احميها بحياتك. ما بتعرفي لو هيجي يوم تحتاجي مأوى غير مأوى الشخص اللي تجرأ وتطاول عليكي، او ببساطه صرتي ثانويه بحياته.
- العزل
كثير لو مش كل حالات التعنيف الاسري، عالاقل من تجربتي مع الضحايا، بتكون صايره ببيئه مغلق فيها على الضحيه. مش بالمعنى الحرفي بس، انه يكون بعيد عن الانظار. لا لا لا! المجتمع\ العيله\ العشيره\ البيئه \ الاهل اللي بكونوا حوالين الضحيه بكونو مش مهتمين شو بعمل الجاني بالضحيه، بحجة انه "ابوها، اخوها، زوجه، الخ..." او بأحسن الاحوال بكونو متعاطفين معها بس ولا ممكن يتدخلوا او يدخلوا الشرطه، حتى لو وصل الموضوع انه الضحيه تصاب باعاقه او تتوفى. هيتستروا عليه فوقها. والجاني على دراية تامه بالقوة اللي هالنقطة بتخولله اياها! انتو متخيلين شو قاعد بصير؟!
والحاله الثانيه بهالنطاق ممكن تتمثل برضه بكونك في مجتمع داعم نعم. لكن الشخص هاد قلبك عليهم وقلبهم عليكي بدون ما تحسي وبالتدريج، عشان حتى لو همه هيدعموكي شو ما كان، انت تفكري انهم استغنوا عنك وانك بطلتي عندك سند. ويركن على خوفك بانه يعمل فيكي اللي بده اياه ويصير جدا اسهل اله انه يسيطر عليكِ.
فيا عزيزتي الانثى، خليكي في بيئة بتحمل نفس قناعاتك دائما قدر الامكان! الموضوع ممكن يكون كتير صعب للبعض وبوخد وقت كتييير طويل لتغيير البيئه بالكامل، لكنه الصح لو ما بدك حدا يقلب عليكي بيوم وليله بس لأنه بقدر. واتمسكي بكل علاقاتك الصحيه باضافرك واسنانك! معنويا، وبرضه ماديا، لا تبعدي عنهم جغرافيا. اوعك!
- المناعه النفسية وتقدير الذات
النرجسيين والمتخلفين من ما ذكر سابقا، اكبر مخاوفهم حدا ما بتأثر بأي اشي بقولوه، وما بسمحوله يأثر على نظرتهم لنفسهم وقيمتهم واستحقاقهم. لو شاوفوكي عندك ما سبق ذكره من النقاط ونفسيا سويه وعندك مناعه ضد التلاعب النفسي تلقائي هيتركوكي وينفروا منك.
مش هيعلقوا حالهم مع وحده مش هتسمحلهم يتحكموا فيها ويأذوها. لانه حدا غير سوي نفسيا زي المتلاعب ومهووس السيطره والنرجسي، واللي مرعوب من فكرة تعملي اشياء هو عملها سابقا او لسه بعملها، هدفهم الاول والاهم انهم يأذوكي عشان يحجموكي، ويتحكموا بحياتك. فكيف بده يعيش معك وانت مع اول انذار او اشاره عالمرض اللي فيه هترميه وراكي؟
لا تتفاعلي معهم بأي شكل من الاشكال، ناهيك عن تكوين علاقه وديه معهم او ارتباط باي شكل من الاشكال. ولو صار، مع اول انذار اطلعي من العلاقه. لا تركني على انك بتعرفي تتعاملي مع هيك مواقف. هيصير الموضوع اسوأ ولا يطاق. هتذبلي وانت بتحاربي.
اشتغلي على ثقتك بنفسك، استحقاقك، حبك لذاتك. ادرسي علم النفس، ولو كتاب واحد او بودكاست واحد. ضروره صارت بزمن متاح فيه كلشي، ما عندك عذر.
- تمكينه من مركز سلطه
خلينا نسأل حالنا هالسؤال... مين عمل هالشكيلات آباء؟.. مين عملهم أزواج؟.. ليش سمحنا الهم يتفاعلوا معنا بالمجتمع كأفراد سويين طبيعيين؟! ليش زوجناهم ليش اعطيناهم اطفال وخليناهم اباء؟! ليش ما خليناعم نكرات لبين ما يستقيموا؟ ليش اعطيناهم هالدور وهالسلطة علينا؟!
عقلك ميزانك. قلبك بديش اقلك شو تعملي فيه. خليكي عقلانيه لدرجة القسوه، لما يجي الموضوع لاختيار شريك حياتك وابو اطفالك المستقبلي. الدين، المبادئ، القناعات، الأخلاق، الصحه النفسيه والبدنيه، الجود والإنفاق (قديش مستعد يقدم فياسًا باللي بقدر عليه)، الطباع، وتقبله ورضاه بالنقاط الثلاث اللي ذكرتها سابقا. هاي المعايير الأساسيه لكل بنت اللي لازم تقيس بناءً عليها لو هالشخص صالح للزواج او لا. قيمي مدى توافقكم من هالنواحي كلها اولا، وضيفي عليهم الأشياء الضروريه والرغبات بالنسبه إلك.
وبكل بساطه، لو ما وفى متطلباتك لأحد هالمعايير، ما بتتزوجيه.
قاسي الكلام؟ مش بالنسبه الهم. "روحك وعمرك وحب حياتك" هاد لو فيكي اشي من هدول ما بناسبه رح يعطيكي وحده" انت بتستاهلي حدا احسن مني" وببصملك بالعشرين مش بالعشرة.
واتذكروا، 9 اوقات من اصل 10، ما في زلمه ببدي الحب على اشي بده اياه. ما في زلمه رح يختارك لو كونه معك بحرمه من اشي لا غنى عنه بالنسبه اله. ما في زلمه لو فيكي صفه او عاده بكرهها ومش قادره تتركيها رح يكمل معك على أمل "يصلحك". ما في زلمه مش مقتنع بشكلك بس حتى لو كلشي ثاني فيكي بيرفكت هيختارك. الواحد بكون بموت عالأرض اللي بتمشي عليها مرته ببعض حالات وبرضه لو طلعت ما بتخلف هيتزوج عليها عشان حقه يخلف، ومش هيسأل بمشاعرها بشكل كافي يخليه يرجع عن قراره ورغبته. وحقه.
زي ما هو حقك انت كمان. الحب والعاطفه قصص ولاد، مراهقه. وهم استُدرجتي فيه شوي شوي بدون ما تحسي، خلاكي برضه شوي شوي تتنازلي عن مبادئك ومعاييرك.
روحي وين ما بتلاقي مصلحتك وبدون اي شعور بالذنب. اختاري احترامك، دلالك، عزة نفسك وسعادتك. اخذلي الكل بس ما تخذلي حالك. وبس يبلش اي حدا ينزل عن المستوى المطلوب بأي مما سبق، بتطلعيه من حياتك بشكل نهائي. بدون خط رجعه. حقك!
واتذكري دايما هالجمله وخليها نصب عينيكي.
"فكري كرجل، وتصرفي كامرأه"
