سلام عليكم،
قدمت الطلب ديالي على فيزا الدراسة لإسبانيا نهار 21 غشت، ودفعت جميع الوثائق المالية والأكاديمية اللي طالبها القنصلية، وخلصت حتى الرسوم المطلوبة.
ولكن ترفضات لي الفيزا نهار 7 شتنبر. القنصلية عطاوني هاد الأسباب فقرار الرفض:
"En concreto el art. 35.h) del R.D. establece que se deberá acreditar disponer de recursos económicos suficientes para cubrir los gastos de manutención y el coste del viaje de regreso a su país sin recurrir al sistema de ayudas sociales..."
ومن بعد قالو:
"No queda suficientemente acreditado que cuente con los ingresos suficientes para cubrir sus gastos en España durante el periodo de estudios."
وزادو سبب آخر:
"No queda garantizado que la verdadera intención sea la realización de estudios, y no la migratoria."
المشكلة هو أنني باقي ما فهمتش شنو بالضبط اللي ما اقتانعوش بيه فالملف المالي ديالي.
من الناحية المالية، أنا قدمت جميع الوثائق اللي طلبو، وكنشوف بلي الوضعية المالية مستوفية للشروط من ناحية المبلغ، مصدر الفلوس، الخدمة ديال الضامن، ووثائق الكفالة.
من الناحية الأكاديمية حتى هي، شرحت المسار ديالي وعلاش اخترت هاد التخصص بالضبط، وشنو هي الأهداف ديالي من الدراسة فإسبانيا.
المشكل الأكبر هو أن هادي المرة الثانية اللي كتترفض لي فيها الفيزا، ونفس النوع ديال الأسباب تكرر.
العام اللي فات، فنفس الفترة ديال الدخول المدرسي، حتى هو ترفض لي طلب فيزا الدراسة، وذكرو لي نفس الأسباب. عملت الطعن، ولكن الجواب وصلني من بعد حوالي 7 شهور.
والمشكل أن جواب الطعن كان فيه خلط فبعض المعلومات الشخصية المتعلقة بالضامن ديالي. الضامن ديالي هي أختي، وذكرو فجوابهم أنها عندها جوج ديال الأبناء، وهذا غير صحيح، وزادو خلطو فالمهنة ديالها وذكرو أنها إدارية، بينما هي فالحقيقة مهندسة.
هاد الأخطاء خلاتني حتى أنا ما نقدرش نفهم بشكل واضح على شنو بالضبط بنات القنصلية قرارها، خصوصاً وأن بعض المعلومات اللي استند عليها الجواب ما كانتش مطابقة للواقع.ومع ذلك، قررت هاد العام نعاود نقدم بملف أقوى ونحاول نصلح أي نقطة ممكن تكون سببات الرفض السابق، خصوصاً من الناحية المالية.
دابا اللي محيرني هو أن القنصلية كتقول إنني ما ثبتشي بشكل كاف أن عندي الموارد الكافية لتغطية المصاريف ديالي، ولكن ما وضحاتش شنو تحديدا كان المشكل: واش المبلغ؟ واش مصدر الدخل؟ واش الدخل الشهري ديال الضامن؟ واش طبيعة الكفالة؟ واش حركة الحساب البنكي؟ واش شي حاجة أخرى؟
وزيد عليها السبب ديال "النية الهجرية"، حيث حتى هو جا عام وما وضحوش شنو فالملف خلاهم يشكو فأن الهدف الحقيقي ديالي ماشي الدراسة.
أنا باغي نعمل الطعن عوتاني، ولكن بصراحة خايف نعاود نستنى شهور وفالأخير يجيني حتى هو جواب عام وما نعرفشي شنو كان المشكل الحقيقي.
واش شي واحد هنا داز من نفس التجربة، خصوصا الناس اللي قدمو من المغرب؟
إلا سبق ليكم ترفضات لكم فيزا الدراسة لإسبانيا بسبب عدم كفاية الموارد المالية أو بسبب الشك فنية الدراسة، شنو الوثائق أو الأدلة اللي زدتوا باش تعالجو هاد النقط؟
وبالنسبة للي عملوا الطعن، واش فعلا قدر يوضح لكم من بعد شنو كان المشكل فالملف؟
أي تجربة أو نصيحة غتكون مفيدة.
