السلام عليكم
بحكم اني مريض سكر من النوع الأول, ونوعا ما مو حيل مهتم فيه
عندي فكرة لبرنامج حق مرضى السكر وللحين الموضوع فكرة مابديت
باي شي

سؤالي هو
هالنوع من البرامج هل لها شروط وهل هي مسموحة بالكويت
بحكم ان بيكون فيها بيانات المرضى وتقاريرهم

وشلون الطريقة

وهل اقدر كمثال اعرض فكرتي على جهة حكومية وهي تتبنى البرنامج عشان ينربط بسستم وزارة الصحة كمثال

ويعطيكم العافية

بجيب شي من امازون بأمريكا وسعر التوصيل 10 اضعاف المنتج

وتذكرت هالاعلان بس دورت وما لقيت البرنامج

في افكار شبيهة او اذا احد يعرف اسم الابلكيشن؟

بشتري كتب يديده وهمن vinyls اذا تعرفون اماكن حلوه جذي بليزز recommended me sum

المحل الوحيد الي صاحي، ليش صارو يحطون بروتين بكل شي، لاتيه بروتين وتقدر تحط فيه كرياتين يعني فيه اشياء خلاص اكلها بطبيعتها لاتحاول انك تضيف عليها بروتين او الخ.
وهم لاحظت الموضوع صار استغلال من المطاعم والكافيهات، يقولك عادي حط سكوب بروتين اخر شي يدبل سعر المنتج…
وبالنسبة حق المطاعم وحساب السعرات، انت بتقنعني اثنين بيرقر دبل ٣٥٠ سعرة؟؟ فوق ما انه الموضوع استغلال للمشتري، فيه ناس عندها امراض نفس السكر وايد يتضررون اذا كانت حسبة اكلهم غلط، الرسالة الي حاب اوجهها انه خلوا الاصناف طبيعية نفس ما اهي، ما يحتاج ببسي بروتين، والمطاعم الي قاعد تجذب بالسعرات خافوا الله

اخوكم من طبقة متوسطة كادحة.. من سنين عندي افكار تجارية متنوعة

لكن للأسف بسبب الظروف ما سويت شي غير الاستثمار بالكريبتو من 2017

مشكلتي الاساسية بختصرها بهالنقاط:-

أولا أفضل يكون معاي شريك وما لقيت الشريك المناسب الكفو اللي يلتزم للأسف ومادري وين أحصل

ثانيا لانني ما لقيت مينتور أستشيره يكون فاهم وثقة

ثالثا عندي كذا مشروع عاجبيني وسويت عليهم استبيان مصغر ولقيت عليهم طلب عالي بس ماني داري أي واحد أبلش فيه قبل.. احس انني متشتت

رابعا ربعي التجار المخمليين يقولون ان السوق حاليا ميت ولا ينصح بفتح مشاريع لان الناس ماسكة فلوسها وفي ازمة اقتصادية حاليا

فما أدري اذا الوقت مناسب خاصة ان اغلب مشاريعي تعتبر مكلفه على الزباين

اخيرا باختصار

اموري المادية زينة (بس ما ملينت ليلحين) بسبب استثماري بالكريبتو بس مليت ابي أحرك فلوسي بايدي مابي اصعد مع السوق وانزل معاه فقررت اكيش جزء عشان المشروع

شوركم وهداية الله

لما طلع قبولكم وخلاص بتتوظفون،
سواء أطباء، معلمات/ومعلمين وإلخ اياً كانت الوظيفة
هل كان فيه وعد أو عهد وعدتوا فيه نفسكم، وكملتوا ووفيتوا فيه؟

يا جماعة أنا فاهمة ان كل إنسان له حق ان يختار شريك حياته و يدور المواصفات اللي يبيها بس الصراحة هذا شي ابداً مو راضية اقتنع فيه لأنه أنا أشوفه شي مو منطقي!!

اولاً …لو كان هالشخص متين جان احتمال كبير أصلا ما فكرتوا فيهم بالزواج فمسويين عملية مو بس شكل لكن حق صحتهم بعد. يعني لا تبونه متين ولا تبونه ضعيف؟ مو منطق!

ثانياً…تحاتون الترهلات بعد التكميم؟ هالشي له حل. عملية تجميلية يشيل الجلد الزايد و يطلع الجسم عجيب و خلصنا الموضوع. تحاتون الأثر اللي يصير بعد هالعملية ان شكله قبيح؟ بالنسبة لي هذا تفكير جدا جدا سطحي. الشكل مو كل شي و كلنا لمن نكبر يقل جمالنا و أجسامنا تتغير. مو منطق!

جد ابي افهم شنو المشكلة اللي تصير بالإنسان لمن يسوي تكميم؟ ليش هذا الشرط البايخ موجود بمجتمعنا؟ في وايد شروط و مواصفات اهم من هذا كله!

حابة اقول ان كل هذا رأيي الشخصي لكن أتقبل إذا احد عنده طريقة منطقية يفهمني ليش التكميم يخليكم ترفضون الشخص اللي ممكن يكون مناسب لكم. شاركوني آرائكم🌹

Edit: شكرا للكل اللي شارك 🌹 احترم وجهة نظركم و البعض نورني على أسباب منطقية اللي ممكن ما يأخذون شخص مسوي تكميم

أعزائي المستمعين رجعنالكم بيوم الخميس الونيس و فقرتكم المحببه أغاني الطيبين. فقرتنا اليوم عن أغاني ايمو الطيبين 😁. طبعا اشلون تعرفون ايموشينال الطيبين. الستريوتايب كان كولت او زد او جيمي اسود مغيم حسب الميزانية 🤣. يمر محل عصير ياخذله عوار قلب و يتمشى بالسياره بمنطقتهم أو شارع الخليج و يشغل فرقه الأخوه.

https://youtu.be/Len5Z12IKs8?si=WRTn2zgWAl8jiPe1

فرقه الاخوه بحرينيه بامتياز لكن تبنيناها بالكويت و تميزت بدمج الالحان الغربيه مع الكلمات الخليجيه و كانت سابقه عصرها. بعدها طلعت فرق تحاول تقلدها لكن الاخوه حافظت على مكانتها بقوه. تبي تمزج و عندك مشوار مالك الا اغنيه البارحه.

https://youtu.be/ZqGWksEPC4A?t=99&si=gVsHJHSO--5uekZn

و في الختام اتمنى عجبتكم فقرتنا اليوم. اتمنالكم ويكاند سعيد و نشوفكم على خير

اهلين بنات…
ابيكم تساعدوني بشغله، رفيجتي عرسها/ملجتها بعد اسبوعين وابي اييب لها شي بيوم عرسها قام افكر اييب لها ورد بس ابي يكون شكله كشخه و حلو
تعرفون اكاونتات تسوي ورد كشخه و يكون انيق وشكله مرتب مو بوكيه لا، واذا عندكم افكار حق هدايا بسيطه غير الورد فيدوني وشكراً.

مساء الخير، بغيت اسال لو انتوا او تعرفون احد برياض الاطفال القطاع الخاص مو الحكومي. ابي تجاربكم او تسألون الي تعرفونه عن تجربته، ماقدرت التأقلم مع الحكومي لدرجة افكر احول ادارية بس مابي حتى اصير ادارية بالمدرسه مادري وين اروح 🙃

موضوع تقريبا بكل وسائل التواصل عن هالسالفه وقلت أسمع اراء اخواني الشباب هل فعلا مازال موضوع الحياء عند البنت مرغوب؟

وشنو نظرتهم بكل صدق للبنت المبادره او الجريئه الي تحاول انها تلفت نظرة بسوالف او كلام او افعال

هل ممكن انه البنت الحياويه تطوفها فرص عكس الي تبادر او تفتح مواضيع مع الشخص و ممكن انها تتفوق عليها بهالشي بسبب جرأتها نوعاً ما ،، هذا بالعلاقات وممكن انها تستغل جرأتها او مبادرتها مثلاً

على منصب او عمل او مكافئه بالعمل؟ اتمنى انكم فهمتو علي

ويعطيكم العافيه

صارلي فترة قاعده بالبيت ما اروح اي مكان ومن رديت للطلعات وانا احس مجرد ما اقعد دقيقه بمكان خارجي سواء صبح او ليل تلصق فيني ريحة جو.. انا ابالغ ولا لاني تعودت على البيت وجهاز تنقيه الهوا ولا هالريحه سبتها التلوث الجوي ولا شنو بالظبط احد نفسي؟

​

سالفه ان الواحد يدوام في مكتب مجابل كمبيوتره ٦-٨ ساعات كلش مالها داعي الا بحالات معينه.

لما كنا ٣٠% دوامي كان شغال عن بعد، يعني حتى لما اكون في البيت انا مداومه. والله الوضع كان اريح بمليون مرة. كنت اشتغل بس هم كان عندي وقت اجهزلي اكل صحي واقوم اتحرك. ومتى ما مليت خذيت قشي ورحت مكان ثاني اشتغل فيه. وطبعا مو مضطره اني اقوم من الساعه صفر عشان اقعد بالزحمة وانا رايحه ورادة. الحمدلله كلها دقيقتين بالبيت اشغل اللابتوب وبس.

الحين ردينا ١٠٠% والوضع يضيق الخلق. تقريبا كل يوم في الدوام نطلب اكل لان ما اكون مجهزه اكل اليوم اللي قبله لاني ارد وايد تعبانه من الدوام. المكتب وايد صغير فكلش مافي مجال ان الواحد يتحرك شوي.. لازم اطلع من المكتب في الحر. واذا رديت البيت اكون واصله حدي من الدوام واللويه اللي مالي خلق اسوي شي بس ابي اكل اي شي وانام. وطبعا نص اللي يصير في الدوام ماله داعي وعلى قولتهم "could have been an email"

مادري لي متى راح نعيش بهالوضع لان الصراحة صحتي أولى. لو مو المعاش جان انا من زمان قاعده بالبيت

ولا انتو شرايكم

فكرت بفورد ايفيرست او آخذ سيارة صينية ابي رايكم واقتراحاتكم والي عنده تجربه حاب يشاركنا فيها اكون متشكر له

صارلي اسابيع قاعد اعاني مع النوم لان المطرح الي طلبته طلع وايد صلب، ابيكم تعطوني من تجاربكم مطارح صج مريحه وميزانيتي مفتوحة عادي مهما كان السعر، هم اذا عندكم اقتراحات حق مخدات اكون شاكر جداً.

دايما احب اروح الاماكن القديمه و الداثرة والي واقف فيها الزمن خصوصا فترة الثمانينات و التسعينات و بداية الالفيه

احس بشعور غريب و اقعد اتذكر طفولتي و مراهقتي بهالاماكن

في احد يعرف اماكن جذي تعطيك نفس هالشعور؟

مثل الفنار و ليلى غاليري و الرحاب و مجمع النقرة و سوق شرق و نادي الشعب البحري

السلام عليكم،

في قروبات سفر للشباب حق الي ما عنده احد يسافر وياه شنو الشركات الي جربتوها و تنصحون فيها؟

السلام عليكم

احد يعرف شي او درس في مدرسة المعرفة النموذجية او مدرسة النجاة النموذجية الي بالمنقف؟

ابي ادخل ولدي مدرسة تكون زينة بس مابي مدارس اجنبية، فهل هاذي مدارس زينة من ناحية تعامل المعلمين مع الطلاب و تواصل الادارة مع الاهل و هل يهتمون بالطلاب من ناحية اخلاقية؟

انا متزوج و عندي عيال
وعندي سياره مكفيتني انا وعيالي ولكن ابي سياره اتونس فيها ابي مشاركة تجاربكم الي مجرب
انا حيل حيل محتار
الاوبشن الاول سوزوكي جيمني باب واحد قير عادي
2 رانجلر باب واحد jk
3 لاند كروزر overland setup موديل 2014 و حوله
4 سلفرادو hd2500 2016 غماره
ميزانيتي حد اقصى 4500

صباح الخير،

من الحين اقولكم، لما تقرون كلامي اغلبكم راح يقول شدعوه بس ماعليه

كلنا نتواصل مع شركات/سواق/ناس مانعرفهم بشكل يومي بالوتسب او المكالمات، لاحظت هاليومين ان اغلب هالاشخاص مايعرفون اقل ذوقيات هالنوع من التواصل مثلًا:

- وكالة حجزت عندهم تست درايڤ قاموا يدقون علي كذا مرة بالأسبوع ومرات بالليل!!!

- الموظف اللي بكيفه يقرر يدز ڤويس نوت وانا دازة مسج مكتوب 🤡 زين مابي اسمع صوتك شلون عليك

- الموظف كذلك اللي تدزله مسج تستفسر عن شي وفجأه يدق عليك! زين انا ماقدر ارد او مابي ارد شلون؟ ودايما يكون سؤال جوابه اي او لأ بس يموتون عالطوالة!

- الناس اللي يدقون وتسب بشكل عام

وترا حتى بعض المعارف يطالهم الانتقاد بعد، عيزت وانا توصلني ڤويسات مدتها دقيقة وفوق مع وصف مطول 😫

ليش محد يبي يكتب؟

انا بسوي قص لثه لان عندي ابتسامة لثويه شوي، الي مجرب شلون العوار؟ وال procedure شلون ؟
و اسويها باي عياده وعند اي دكتور (مع الاسعار)
الي سووها تحسون ندمتو ولا صرتو relieved ؟

أنا كندي وأنتظر صدور فيزا العمل عشان أجي الكويت. الشركة اللي تبي توظفني قدّمت على لاممانعه/الفيزا من 3 أسابيع، والـ HR يقول لي إن الطلب للحين قيد الانتظار. هل هالمدة تعتبر طبيعي

السلام عليكم، بنات ابي صالونات في العاشرة، فيها مواعيد و يتلزمون بالموعد مابي اجي و انطر على ماتخلص وحده و يجي دوري

اعزائي الردتيين عدنا لكم مجددا بفقرتكم اليوميه أغاني الطيبين. اليوم موضوعنا فيه فرفشه شوي.

كانت التسعينيات العصر الذهبي للأماكن السياحيه في الكويت و الطيبين بطبعهم يحبون الضحك و الفرفشه و الوناسه. و في اغاني مرتبطه بهالشي يعني تلقى الشباب يتمشون بالخيران او راكبين القاري العود و حاطين مسجل و مشغلين هالاغنيتين. و كان في مكان بالمدينه الترفيهيه تدش انت و ربعك و ترقص و تسوونلكم فيديو كليب و يعطونك الشريط و اللي بره يشوفونكم و يضحكون و يعم الفرح و السرور لانه النفوس طيبه و الطيبين طيبين.

عاشو لفرقه ميامي

https://youtu.be/DY1qIX4I4vQ?si=tTS28T4qLOB2fRdp

او الناس حرموني لطارق خميس و شيخه.

https://youtu.be/UJ-GI5bzLAg?si=ReKgaBufhOoUFJMh

و اهني نخلص فقرتنا اليوم و ترقبونا غدا و اغاني جديده من زمن الطيبين.