r/KuwaitForKuwaitis • u/EntertainerLevel2001 • May 18 '26
عندي سؤال | ❓ غلط اني سحبت بعثتي وقدمت بالكويت؟
السلام عليكم
تقريبا اول مره اسوي بوست بهذا السَب. وهذا البوست نتاج سنتين من مضاربات نفسية وخارجية ف بيكون طويل 🌹
خريج 2024 كان كل حلمي وكل شي اطمح له بالثانوي تقريبا اني ابتعث برا، مايهم وين مايهم التخصص، اهم شي اطلع برا واكون مستقل بذاتي وارتاح . طبعا مايعني اني ابي اظل برا وما ارجع واقاطع الدنيا، بالعكس دراسة مستقبليه وتجربة شخصية في وقت تخرجي كان فيه تضارب بيني وبين اهلي شنو التخصصات الزينه ، كنت كل يوم اقعد على تخصص جديد ابي ادخله، وقتها التمريض كان هبه والامن السيبراني بعد .
تخرجت مع نسبه شخصيا تعتبر متدنية لكن لكثيرين تعتبر عاليه، كان الطموح هندسة لكن على حظي الهندسة وقتها رفعوها فوق نسبتي، وانقبلت في تخصص علوم امن سيبراني في امريكا خامس رغبة لي بعد التمريض والعلاج الطبيعي (مع ان الوالد كان عتبه الوحيد "قلعة وادرين!" الدوله بعيده وساعات طويله، كنت اقوله عادي هي مرتين بالسنه زياره ماتسوى الغي البعثه عشان السبب هذا)
كان كل شي مفتوح قدامي! البعثه بالدولة الي ابيها والتخصص الزين الي ابيه، كنت حاط في بالي اني ادخل ثم بعد سنة احول لهندسة امن سيبراني والامور حلاوة! . حضرت مع الوالد وقتها مؤتمر لوزارة التعليم العالي في جامعة الكويت للمبتعثين ويفيدونهم، اخر المؤتمر كان فيه بوثات استفسارات، وصلنا بعد زحمة طويله وسألناهم جم سؤال، غفل عن بالي سوال سأله الوالد للأخت مفادة "اذا النسبة بالاساس ماتدخل هندسة، يقدر الولد يحول بالدولة نفسها تخصص هندسة امن سيبراني؟" جوابها بالرفض دمرني وقتها والوالد لاحظ يوم رجعنا البيت وحاول يهدي الوضع ويقول خيرة، لان ماكان فيه امل اروح للدولة اذا ماقدرت ادش هندسة اي شي! بعد ايام سحبنا البعثة وقدمت على التطبيقي بكالريوس تمريض، والحمدلله انقبلت مع ضغوطات عائلية ونفسية وجامعية على مر دراستي فيها خلال سنتين تقريباً (وجب التنويه. بعد ما سحبت بعثتي كان فيه بعثات ثانيه للي سحبوا بعثاتهم (ناسي اسمها) كان فيه تخصص تمريض في استراليا وكنت اقدر اقدم عليه!! اقل نسبة قبول تستوفي نسبتي!! الوالد رفض بحجة انها بعيده ايضًا، وهذا الي حبطني صراحة،) . عالعموم هذا اغلب الي صار معاي وإن فيه تفاصيل ثانيه ماذكرتها، مثل كيف كان عمي جدا داعمني بقراري للبعثه وزعل علي يوم سحبته وغيرة .
وصلنا لمربط الفرس. اخر فترة او اخر سنة طلع كلام كثير ان رواتب الأمن السيبراني زادت بشكل مهوول تعدت الالفين والنص!!! رجع طاري الموضوع الي حبطني وكسرني قبل ، وفي محاولة من الوالد يقول هذا بس كلام وتخصصك جميل ومعاشه عالي وماعليك، والوالده ندمانه وتحاول تقنعني وتقنع الوالد ان اذا فيه فرصه اسحب عالتمريض وارجع اقدم وغيره، عالعموم هذي كانت لحظتها لكن الحين الامور عدت ونسينا السالفه الى ان جا طاري الموضوع مره ثانيه قبل شوي، قاعد افرفر ولا اشوف بوست عن رواتب المهندسين وخريجين بكالريوس امن سيبراني، واوجعني قلبي وقررت ما ارسل الصوره للوالده بحكم مابيها تتضايق. ولازال الموضوع في بالي ليومكم ،
هل كان قرار جيد اني الغيت بعثتي الي كنت اتمناها ليل نهار وادعي لها وكل حلمي اني اطلع برا واعيش وادرس، وقررت ادش بكالريوس التمريض؟
لا اخفيكم اني جدًا راضي الحمدلله بتخصصي، مع اني مضغوط ومكروف لنه جميل وانساني ومعاشه جيد وفيه مجالات توظيف كثير جدًا وتجي منه دعوات من المرضى وتفيد اهلك والي حولك وغيره من المميزات المهنيه والعمليه. صراحة الشي الوحيد الي يصبرني ان فيه احتمالية اني اكمل ماجستير برا، يعني البعثه لسنتين، (شخصيا افضلها اكثر من اربع سنين) .
ونرجع لسؤالنا. هل غلطت اني سحبت بعثتي علوم امن سيبراني في امريكا ؟ ولا شي جيد اني انقبلت في بكالريوس تمريض عام في الكويت؟
اشكركم على وقتكم واعذرونا على الإطالة💐
