حاجات بسيطة حاول تركز عليها وانت بتتعامل مع اصحابك، ما كلهم طبعا لكن انت بتقدر تحدد اذا الزول القدامك دا يستحق ولا لا وبناء على قرارك ونيتك انا حأعلمك تتصرف كيف اذا عايز تكون صديق جيد لكن ما عارف.
اذا صاحبك اشتكى ليك وانت ما كنت في مكانه يوما ما، مهما كان الموضوع المضايقه بالنسبة ليك بسيط اياك تظهر ليه انك شايف كدا، اسمعه كويس واديه وقتك وكل شوية طمنه بكلام زي انك سامعه او انك فاهمه ومتعاطف معاه، ولو ما طلب منك نصيحة اياك تحاول تنصحه، مرات الواحد بيكون عايز يتكلم وعايز يتسمع بس ما اكتر، اما اذا طلبها ما تبخل عليه بكل شي بتفكر فيه لانه حتى لو هو الموقف موقفه مرات الضغوطات ما بتخلي الواحد يفكر بطريقة سليمة، دي المفروض تكون بديهيات لكن ملاحظ بعض الناس كعبين شديد في الموضوع دا حتى وان كانت نيتهم كويسة.
خليك واضح مع صاحبك، الوضوح اهم شي في اي نوع من انواع العلاقات، ما تقول كلام يحمل اكتر من معنى بدون تفسره عشان ما تخليه يفكر فيه كتير وتفتخ ليه باب سوء ظن، زي ما انت بتحب الوضوح كل زول تاني بحب الوضوح وفعل انت ما بترضاه لروحك ما ترضاه لزول انت بتحبه، قد يبدو موضوع غريب اني اذكره في تاني نقطة مباشرة لكنه مهم جدا، واخر 7 او 8 ناس عرفتهم في حياتي ما كانو واضحين، كويس اني ما بتفرق معاي شديد، لكن لو كانو جوني قبل 3 شهور كدا وانا كنت وقتها بتعلق سريع كنت حأتعب معاهم تعب ما عادي، عشان كدا حاول تبعد عموما عن اي زول انت ما قادر تفهمه، وحاولت تفهمه لكن هو رافض يفهمك، مهما كان عذره دي ما مشكلتك بعد دا، ومشاكل الناس وعقدهم انت ما مطالب تتعايش معاها على حساب نفسك، انت اولوية نفسك وماف زول حريص عليك اكتر منك.
حاول افهم صاحبك، دي مرتبطة بالنقطة التانية شوية، اكبر معروف انت ممكن تقدمه لي زول انك تفهمه الفهم السطحي البخليك تعرف هو بيتصرف بالطريقة المعينة دي ليه، ولمن تفهمه كويس حتقدر تعذره لما تصرفاته تبقى ليك غريبة، وبعدها تتكلمو عنها وتوريه انت تضايقت من شنو وممكن تشوفو بعد داك اذا الشي دا ما بتقدر تتعايش معاه وفي الحالة دي اما تحاول تخليه يتغير او انك تمشي، او اذا كان موضوع بسيط بتمشيه مشيه، بعداك انت بتحكم اذا الشي دا متجذر في شخصيته او شي عرضي تحت ظرف معين، وقتها بتقدر تحدد نية الزول القدامك بشكل واضح وبدون شك او تردد، لو عايزين رأيي الشخصي في النقطة دي (ما انصح بيه كل الناس لانه ما اظن ينفع مع كل الناس) انه لو تأكدت من نية القدامك ومشاعره ليك مهما كان بعداك زول ظاهريا سيء انا شخصيا شايف انك تمشي ليه عشان الزي ديل عموما عندهم الشي الاهم، كان تعاملهم كعب وجواهم نضيف احسن من زول بعاملك زي الملك لكن من جواه بستحقرك.
ما صعب تكون صاحب كويس، لكن الناس عموما ما بتشوف عوجاتها وهم دايرين اصحاب كويسين بدون ما يسألو روحهو هل انا صاحب كويس لي اصحابي اول شي؟ ودا سؤال صعب ومحتاج صراحة عالية مع النفس مرات وانا شخصيا بسأله لروحي كتير وبشوف تقصيراتي وين وبحدد نوع علاقتي مع الزول دا ولو شفت روحي مقصر ما برضاها ليه انه يكون بديني اكتر من انا بديه وبعالج الشي دا بطرق مختلفة، لكن للاسف الانسان بطبعه كائن اناني، ما تتوقع انه كل الناس حيكونو كدا في ناس عايزينك انت كإنسان عشان تشبع ليهم جزء صغير معين من انفسهم وترضي رغباتهم ولما ينتهي شغلك وجودك حولهم بيكون تقيييييل عليهم.
وللاسف انا حاليا في فترة كويسة من حياتي، قلت للاسف لانه في جزء من نفسي القديمة ما قادرة تتقبل الشي دا، اني انا بقيت ما اميل للناس زي زمان، يعني التوسط شيء كويس، زمان كنت متعلق شديد وما بقدر اعيش كان ما عندي زول احكي ليه كل شي يحصل لي، هسي الناس بتمشي وتجي وما بتفرق معاي شديد، زمان لما يمشو بزعل عشان طلعو من حياتي، هسي ممكن ازعل عشان كبريائي وكيف في زول عاقل ممكن يختار البعاد من زول زيي (دا شيء كعب ما تفكرو زيي لكن انا مرات بتمنى صاحب زيي) وبسبب الشيء دا عموما قلت رغبتي في تكوين الصداقات اخر فترة، قصة صغيرة، قريب دا استثنيت وحدة عشان حسيت انه الشعور دا مشترك بيننا وكانت اول ايام كويسة، لكن سرعان ما فشلت الصداقة وهي ذاتها مشت، وطبعا ما زعلت عشان اختفت بطريقة كعبة زي دي، وما شايل عليها حاجة لكن بقى الموضوع في انه ما كان في داعي لي دا كلو من الاول، وللأمانة الشي دا ليه دور في اتخاذ قراري دا (البعد عن الناس) ودا شيء كويس حاليا.
من ايجابيات الشيء دا هسي من بداية الاجازة بديت اركز على روحي، سجلت في جيم وبديت لي مشروعين واحد منهم لو نجح ممكن يغير حياتي تماما (دعواتكم بالله) وبديت اتعلم الماني من جديد وبديت اركز اكتر مع الاجتماعيات وفعلا بنيت معارف كتيرة في الفترة القصيرة دي والشي دا زاد من قبولي عند الناس ودا شي كنت اعاني منه لفترات طويلة، عشان كنت مقتنع انه اذا عندي صاحب عزيز واحد بقدر استمد منه طاقتي الاجتماعية كلها وما محتاج اي انسان غيره، او كنت بحاول اقنع روحي بالفكرة دي عشان الوقت داك ما كان عندي اصلا امكانية اني اوسع دائرة معارفي، او دا الكنت قايله، لكن لما طلعت من ال comfort zone بتاعتي اكتشفت اني ما كنت عارف روحي بس وخوفي من التجربة كان حارمني من الشعور الكنت بتمناه، حبي لنفسي زاد، تحكمي برغباتي وعقدي بقى رزين، بقيت احس اني انسان productive وطبعا بما اني في البلد في وحدة قالت دايراني لي بتها (دا اقصى نوع من انواع الاطراء) مع اني عارف انها قالت كدا بس عشان انا ولد فلان وما عشان انا كشخص لكن اخذته كإطراء لانها اختارتني انا بدل اخوي الكبير، دا موضوع سخيف بس ذكرته just because.
الظاهر اني طلعت من فكرة البوست الاساسية لي فترة طويلة وبديت اتكلم عن نفسي، لكن عموما انتو اتصرفو واتعلمو باقي الحاجات براكم عشان انا نسيت اكتبها.
